किमान तापमानात होतेय घट

पुणे : गेल्या काही दिवसांपासून गायब झालेली थंडी परतण्यास सुरुवात झाली आहे. राज्यातील किमान तापमानात घट होऊ लागली आहे. शुक्रवारी (ता. २२) धुळे येथील कृषी महाविद्यालयात राज्यातील नीचांकी १० अंश सेल्सिअस तापमानाची नोंद झाली. आजपासून किमान तापमानात २ ते ४ अंशांची घट होण्याची शक्यता असून, लवकरच गुलाबी थंडी परतण्याचे संकेत हवामान विभागाने दिले आहेत.  उत्तरेकडून वाहणारे प्रवाह खंडित झाल्याने, तसेच अरबी समुद्र आणि बंगालच्या उपसागरावरून येणाऱ्या बाष्प युक्त वाऱ्यांमुळे राज्यात अंशत: ढगाळ हवामान होत आहे. परिणामी, राज्यातील थंडीचा कडाकाही कमी झाला. मागील आठवड्यात शुक्रवारी (ता. १७) निफाड येथे तापमान २.४ अंशांपर्यंत घसरले होते. यात दहा अंशांची वाढ होत शुक्रवारी (ता. २४) तापमान १२.६ अंशांवर पोचले आहे. मध्य महाराष्ट्रात अनेक ठिकाणी तापमान पुन्हा १५ अंशांच्या खाली आले आहे. तर मराठवाडा, विदर्भात तापमानात पुन्हा घट होण्यास सुरुवात झाली आहे.  शुक्रवारी (ता. २४) सकाळी राज्यातील विविध ठिकाणचे किमान तापमान, कंसात सरासरीच्या तुलनेत वाढ, घट (अंश सेल्सिअसमध्ये) : पुणे १३.६ (२), नगर १५.५ (४), धुळे १०.०, जळगाव १३.६(१), कोल्हापूर १७.७(२), महाबळेश्वर १५.४(२), मालेगाव १४.६ (४), नाशिक १४.९ (५), निफाड १२.६, सांगली १६.६ (२), सातारा १४.६ (२), सोलापूर १८.८ (२), अलिबाग १९.८ (३), डहाणू १९.४ (२), सांताक्रूझ १९.८ (३), रत्नागिरी २०.२ (२).