सकाळी गारठा, तर दुपारी चटका

पुणे : राज्यात कमाल तापमान पस्तीशीपार गेले असतानाच, रात्रीचे किमान तापमान घसरण्यास सुरुवात झाली आहे. राज्यात कमाल, किमान तापमानातील तफावत वाढली असून, सकाळी गारठा, तर दुपारी चटका, अशी स्थिती अनुभवायला मिळत आहे. सोमवारी (ता. १५) सकाळपर्यंतच्या २४ तासांमध्ये सोलापूर येथे राज्यातील उच्चांकी ३७ अंश सेल्सिअस, तर मराठवाड्यातील उस्मानाबाद येथे नीचांकी १४.५ अंश सेल्सिअस तापमानाची नोंद झाल्याचे हवामान विभागातर्फे सांगण्यात आले.  गेल्या काही दिवसांपासून राज्यात उन्हाचा वाढलेला चटका कायम आहे. अनेक ठिकाणी दिवसाचे तापमान सरासरीच्या तुलनेत २ ते ३ अंशांपेक्षा अधिक असून, पारा ३५ अंशांच्या वर जात आहे. जळगाव, मालेगाव, सोलापूर, सांताक्रूझ, डहाणू, औरंगाबाद, परभणी, नांदेड, अकोला, अमरावती, चंद्रपूर, यवतमाळ येथे उन्हाचा चटका अधिक आहे. रात्रीच्या वेळी तापमान घसरल्याने दिवस आणि रात्रीच्या तापमानात १२ ते २० अंशांची तफावतही होत आहे. पहाटेच्या वेळी धुक्याची चादर पसरू लागली आहे. आॅक्टोबरच्या सुरवातीला राज्यात १७ ते २६ अंशांच्या दरम्यान असलेले तापमान सोमवारी १४ ते २४ अंशांपर्यंत खाली आले होते. किमान तापमानात सरसरीपेक्षा २ ते ३ अंशांची घट झाली असून, अनेक ठिकाणी पारा २० अंशांच्या खाली उतरला आहे. कोकण वगळता उर्वरित राज्यात अनेक ठिकाणी रात्रीचे तापमान सरासरीच्या खाली आले आहे. जळगाव, कोल्हापूर, महाबळेश्‍वर, परभणी, उस्मानाबाद, अकोला, बुलडाणा, गोंदिया, नागपूर, वर्धा, यवतमाळ येथील तापमानात सरासरीपेक्षा घट झाल्याचे दिसून आले.  सोमवारी (ता.१५) सकाळपर्यंतच्या २४ तासांमध्ये राज्यातील विविध ठिकाणचे कमाल, किमान (कंसात) तापमान (अंश सेल्सिअसमध्ये) : पुणे ३४.२(१८.६), नगर -(१६.०), जळगाव ३६.६(१८.०), कोल्हापूर ३४.१(२१.८), महाबळेश्‍वर २८.१(१७.२), मालेगाव ३५.४(२०.४), नाशिक ३४.४(१७.३), सांगली ३४.३(१९.२), सातारा ३३.१(१९.४), सोलापूर ३७.०(२०.६), सांताक्रूझ ३५.५(२३.५), अलिबाग ३२.७(२३.७), रत्नागिरी ३४.४(२३.५), डहाणू ३६.१(२३.७), आैरंगाबाद ३५.१ (१७.०), परभणी ३५.१(१५.१), नांदेड ३६.०(२०.०), उस्मानाबाद -(१४.५), अकोला ३५.६(१९.५), अमरावती ३५.६(१९.४), बुलडाणा ३१.२(१९.२), चंद्रपूर ३५.२ (२२.६), गोंदिया ३५.५(१९.४), नागपूर ३४.४(१८.६), वर्धा ३४.६(१८.०), यवतमाळ ३६.०(१९.०).

कोकणात हलक्या पावसाची शक्यता अरबी समुद्रात लक्षद्वीप बेटांजवळ १.५ ते ५.८ किलोमीटर उंचीवर चक्राकार वारे वाहत असून, कर्नाटक किनारपट्टीजवळ ढगांची दाटी झाली आहे.  दक्षिण तमिळनाडू, कर्नाटकमध्ये असलेल्या दोन चक्राकार वाऱ्यांची स्थितीमुळे दक्षिण भारतात पावसाचा जोर वाढणार आहे. आजपासून (ता. १६) दक्षिण कोकणात हलका पाऊस पडण्याची शक्यता हवामान विभागाने वर्तविली आहे.  राज्यातील किमान तापमानाची तुलनात्मक स्थिती (अंश सेल्सिअसमध्ये)