किमान तापमानात चढउतार

पुणे ः अरबी समुद्र व कर्नाटकच्या परिसरात चक्राकार वाऱ्याची स्थिती तयार झाली आहे. त्याचा परिणाम राज्यातील वातावरणावर होत आहे. राज्यातील किमान आणि कमाल तापमानात चढउतार होत आहे. गुरुवारी (ता.१) सकाळी आठ वाजेपर्यंत पुणे येथे १४.४ अंश सेल्सिअसची सर्वात कमी किमान तापमानाची नोंद झाली असल्याचे हवामान विभागाच्या सूत्रांनी सांगितले.  हवामान कोरडे असल्याने थंडीत वाढ होण्यास सुरवात झाली आहे. राज्यातील नगर, नाशिक, खानदेश, मराठवाडा व विदर्भातील काही भागात चांगलाच जम बसविण्यास सुरवात केली आहे. त्यामुळे किमान तापमानात घट होत असली तरी, गेल्या दोन दिवसांपासून किमान तापमानात चढउतार सुरू आहे.  कोकणातील काही भागात कमाल तापमानात सरासरीच्या तुलनेत लक्षणीय वाढ झाली आहे. विदर्भाच्या काही भागात व कोकण गोव्याच्या उर्वरित भागात किंचित वाढ झाली आहे.  बंगालचा उपसागर आणि श्रीलंकाच्या परिसरात चक्राकार वाऱ्याची स्थिती तयार झाली आहे. ही स्थिती समुद्रसपाटीपासून ३.१ किलोमीटर उंचीवर आहे. तसेच बंगालचा उपसागर आणि आंध्र प्रदेशचा दक्षिण भाग ते श्रीलंका या दरम्यान कमी दाबाचे क्षेत्राची निर्मिती झाली आहे. हे क्षेत्र कर्नाटक व तमिळनाडूच्या दिशेने सरकत असून ते समुद्रसपाटीपासून ९०० मीटर उंचीवर आहे. त्यामुळे तमिळनाडू, पुद्दुचेरी, केरळ व परिसर, आंध्र प्रदेश आणि कर्नाटक या परिसरात वादळी वाऱ्यासह जोरदार पाऊस होण्याची शक्यता आहे. त्याचा परिणाम राज्यातील वातावरणावर होणार असून आजपासून (ता. २) ते सोमवारपर्यत (ता. ५) कोकण, गोवा मध्य महाराष्ट्र व मराठवाड्यात तुरळक ठिकाणी पाऊस पडण्याची शक्यता आहे.   गुरुवारी (ता. १) सकाळी आठ वाजेपर्यंतचे किमान तापमान, अंश सेल्सिअसमध्ये) : मुंबई (सांताक्रुझ) २०.३, रत्नागिरी २०.७, पुणे १४.४, जळगाव १७.४, कोल्हापूर १८.८, महाबळेश्वर १४.८, मालेगाव १८.४, नाशिक १५.१, सांगली १५.९, सातारा १६.७, सोलापूर १८.१, औरंगाबाद १६.२, परभणी १७.९, नांदेड १६.०, अकोला २०.२, अमरावती २०.६, बुलढाणा १९.०, चंद्रपूर २१.२, गोंदिया २१.६, नागपूर १८.५, वर्धा १६.५, यवतमाळ १८.४