पुणे जिल्ह्यातील दहा धरणे शंभर टक्के

पुणे ः गेल्या तीन ते चार दिवसांपासून धरणाच्या पाणलोट क्षेत्रात पावसाची संततधार सुरू आहे. पश्चिम पट्ट्यात असलेल्या एकूण २३ धरणांपैकी दहा धरणे शंभर टक्के भरली आहेत. उर्वरित तेरा धरणांच्या पाणलोट क्षेत्रात अजूनही पाऊस सुरू असून, ही धरणेही भरण्याच्या मार्गावर आहेत.

पावसाचे जवळपास अडीच महिने पूर्ण होत आहे. या काळात पावसाचा काही वेळा खंड पडल्याचे चित्र अनुभवायला मिळाले. काही वेळा जोरदार पाऊस झाल्यामुळे दिलासा मिळाला असून, धरणाच्या पाणलोट क्षेत्रातील ओढे, नाले खळाळून वाहू लागले होते. त्यामुळे धरणात पाणीसाठा वाढण्यास सुरवात झाली.

पुणे जिल्ह्यात आत्तापर्यंत कळमोडी, चासकमान, वडीवळे, आंध्रा, पवना, मुळशी, पानशेत, खडकवासला, नीरा, भाटघर ही धरणे पूर्ण भरली असून, या धरणातून पाण्याचा विसर्ग सोडण्यात येत आहे. उर्वरित असलेल्या पिंपळगाव जोगे, माणिकडोह, येडगाव, वडज, डिंभे, घोड, विसापूर, भामा आसखेड, कासारसाई, टेमघर, वरसगाव, गुंजवणी, वीर, नाझरे या धरणांतील पाणीसाठा जवळपास ५० टक्केहून अधिक झाला आहे.

येत्या आठवडाभर या भागात पाऊस सतत राहिल्यास ही धरणेसुद्धा भरण्याची शक्यता आहे. टेमघर धरणाच्या पाणलोट क्षेत्रात सोमवारी (ता. १३) दिवसभर पावसाची संततधार सुरू होती. त्यामुळे या पाणलोट क्षेत्रात सर्वाधिक १०० मिलिमीटर पावसाची नोंद झाली आहे. मुळशी तालुक्यातील मुळशी धरणाच्या पाणलोट क्षेत्रात ४३, तर वडीवळे धरणाच्या पाणलोट क्षेत्रात ४२ मिलिमीटर पाऊस पडला आहे. नीरा देवधर, पवना, वरसगाव, पानशेत, गुंजवणी, आंध्रा या धरणाच्या पाणलोट क्षेत्रातही पावसाचा जोर कायम होता. त्यामुळे भात पिकांना चांगलाच दिलासा मिळाला असून, पिकेही वाढीच्या अवस्थेत आहे.  

धरणाच्या पाणलोट क्षेत्रात मंगळवारी (ता. १४) सकाळी आठ वाजेपर्यंत झालेला पाऊस मिलिमीटरमध्ये ः टेमघर १००, मुळशी ४३, वडीवळे ४२, पवना २८, वरसगाव २६, पानशेत २१, गुंजवणी १९, नीरा देवधार ३२, कळमोडी १४, आंध्रा ११, पिंपळगाव जोगे ८, माणिकडोह ६, येडगाव ३, डिंभे ५, विसापूर १, चासकमान २, भामाआसखेड ९, कासारसाई ६, खडकवासला ६, भाटघर ८, नाझरे ३.