कोल्हापुरात दहा दिवसांचा  कडकडीत लॉकडाउन 

कोल्हापूर : जिल्ह्यातील कोरोनाची वाढती रुग्णसंख्या पाहता बुधवारपासून (ता. ५) पुढील दहा दिवस कडकडीत लॉकडाउन पाळण्याचा निर्णय मंगळवारी (ता. ४) झालेल्या बैठकीत घेण्यात आला. सकाळी अकरापासून लॉकडाउनला सुरुवात होणार आहे. ग्रामविकास मंत्री हसन मुश्रीफ, पालकमंत्री सतेज पाटील, आरोग्य राज्यमंत्री राजेंद्र पाटील-यड्रावकर यांच्या उपस्थितीत दूरदृश्य प्रणालीद्वारे घेतलेल्या बैठकीत हा निर्णय घेण्यात आला. 

जिल्ह्यात वाढणारी कोरोना रुग्णसंख्या त्या प्रमाणात प्राणवायू आणि रेमडेसिव्हीरची भासणारी कमतरता पाहता सकाळी दूरदृश्य प्रणालीच्या माध्यमातून तातडीची बैठक घेण्यात आली. या बैठकीत जिल्हाधिकारी कार्यालयात जिल्हाधिकारी दौलत देसाई, अपर जिल्हाधिकारी किशोर पवार, निवासी उपजिल्हाधिकारी भाऊ गलंडे, जिल्हा पुरवठा अधिकारी दत्तात्रय कवितके उपस्थित होते. महापालिका आयुक्त डॉ. कादंबरी बलकवडे, मुख्य कार्यकारी अधिकारी संजयसिंह चव्हाण, पोलिस अधीक्षक शैलेश बलकवडे, अधिष्ठाता डॉ. एस. एस. मोरे,  जिल्हा आरोग्य अधिकारी डॉ. योगेश साळे दूरदृश्य प्रणालीव्दारे सहभागी झाले होते. 

पालकमंत्री पाटील म्हणाले, ‘‘जिल्ह्यामध्ये सध्या ऑक्सिजनची गरज वाढत चालली आहे. रुग्णसंख्या आणखी वाढत राहिली तर ऑक्सिजनची अधिक गरज लागेल. वाढती रुग्णसंख्येची साखळी तोडण्यासाठी बुधवारी अकरा वाजल्यापासून जिल्ह्यात कडकडीत लॉकडाउन करावा.’’ मुश्रीफ म्हणाले, ‘‘सर्वोच्च न्यायालयानेही लॉकडाउनचा पर्याय सुचवला आहे. रुग्णसंख्या थांबविण्यासाठी लॉकडाउनचे काटेकोरपणे पालन करावे. पोलिसांनी त्याची अंमलबजावणी करावी.’’ यड्रावकर म्हणाले,  ‘‘लसीकरणासाठी येणाऱ्या नागरिकांना सूट देऊन लॉकडाउन कडकडीत करावा.’’ जिल्हाधिकारी देसाई यांनी या वेळी सविस्तर माहिती दिली. देसाई म्हणाले, ‘‘गेले दोन दिवस रुग्णसंख्येत वाढ कमी असली तरी पॉझिटिव्ह दर कमी नाही. जिल्ह्यातील २४०० रुग्ण ऑक्सिजनवर आहेत.’’