सोलापूर जिल्ह्यातील ‘हुमणी'ग्रस्त उसासाठी दहा लाखांची तरतूद

सोलापूर : गेल्या काही दिवसांपासून जिल्ह्यातील उसाला हुमणीअळीचा मोठा प्रादुर्भाव झाल्याने उत्पादनावर परिणाम झाला आहे. मोठे नुकसान होत आहे. त्यावरील नियंत्रणासाठी कृषी विभागासह कृषी संशोधन केंद्राकडून प्रयत्न सुरू आहेत. त्याचवेळी आता जिल्हा परिषदेच्या कृषी व पशुसंवर्धन विभागानेही पुढाकार घेतला असून हुमणीग्रस्त भागातील उसावर नियंत्रणासाठी आवश्‍यक असलेल्या जैविक खतमात्रेसाठी १० लाखांची तरतूद करण्याचा निर्णय कृषी समितीच्या बैठकीत घेतला आहे.

जिल्हा परिषद कृषी समितीची बैठक बुधवारी (ता. ५) सभापती मल्लिकार्जुन पाटील यांच्या अध्यक्षतेखाली झाली. जिल्ह्यातील पंढरपूर, माढा, मोहोळ, माळशिरस, करमाळा या भागात सध्या उसावर मोठ्या प्रमाणात हुमणीचा प्रादुर्भाव आढळून आला आहे. त्याच मुद्यावर बैठकीत अनेक सदस्यांनी चर्चेची सुरवात केली.

या रोगामुळे शेतकऱ्यांचे मोठे नुकसान होत असून, ऊस उत्पादनात मोठी घट होणार असल्याने जिल्ह्यातील शेतकऱ्यांचा आर्थिक स्त्रोत कमी होण्याचा धोका आहे. कृषी विद्यापीठातील शास्त्रज्ञांनी तातडीने कीड प्रतिबंधासाठी शोध लावावा, अशी मागणी केली. त्यावर चर्चा करून तज्ज्ञांच्या साह्याने जैविक खताद्वारे कीडग्रस्त उसाला आधार मिळावा, यासाठी १० लाख रुपयांची तरतूद करण्यात आली. पॉवर टिलरसाठीच्या ४५ लाख रुपयांच्या तरतुदीपैकी १० लाख रुपये जैविक खतासाठी व उर्वरित ३५ लाख रुपये रोटावेटर खरेदीसाठी वर्ग करण्याचा निर्णय झाल्याचे सभापती पाटील यांनी सांगितले.

कृतिनिष्ठ शेतकरी पुरस्कारासाठी येत्या ३० सप्टेंबरपर्यंत शेतकऱ्यांनी प्रस्ताव सादर करावेत, अशा सूचना देण्यात आल्या. पुढील आठवड्यात होणाऱ्या पशुसंवर्धन समितीच्या बैठकीत आदर्श गोपालक पुरस्कारांच्या वितरणासाठी प्रस्ताव सादरीकरणाच्या सूचना दिल्याचे पाटील यांनी सांगितले.