खरेदी केंद्रांकडे कापूस उत्पादकांची पाठ

जळगाव : खानदेशात भारतीय कापूस महामंडळाची (सीसीआय) फक्त चार खरेदी केंद्र सुरू असून, त्यात सुमारे तीन हजार क्विंटल कापसाची खरेदी झाली. कापसाचे बाजारातील दर हमीभावापेक्षा अधिक असल्याने शासकीय खरेदीस या आठवड्यातही प्रतिसाद मिळाला नाही. पणन महासंघाने सीसीआयचे सबएजंट म्हणून खरेदीसंबंधी सुरू केलेल्या केंद्रांमध्येही कापसाची आवक झाली नसल्याची माहिती सूत्रांनी दिली. 

पणन महासंघाने अमळनेर, धरणगाव, पारोळा, यावल, मुक्ताईनगर, चोपडा, रावेर, धुळे, नाशिक जिल्ह्यांतील येवला व मालेगाव येथे खरेदी केंद्र सुरू करण्याची कार्यवाही केली. केंद्राचे उद्‌घाटन करण्याची तयारी झाली. परंतु खरेदी सुरू झाली नाही. बाजारात कापसाचे दर हमीभावापेक्षा अधिक असल्याने खरेदीचा मुद्दाच महासंघासमोर राहिला नाही. सीसीआयने जळगाव जिल्ह्यात शेंदूर्णी, जामनेर, चाळीसगाव, एरंडोल, बोदवड, भुसावळ, जळगाव आणि नंदुरबार व शहादा (जि. नंदुरबार) येथे खरेदी केंद्रांची तयारी केली. यातील जळगाव, एरंडोल, शहादा, नंदुरबार येथेच खरेदी सुरू झाली. उर्वरित केंद्र सुरू झाली नसल्याची माहिती मिळाली. 

सीसीआयने सुमारे तीन हजार क्विंटल कापसाची खरेदी केल्याचे सांगण्यात आले. सर्वाधिक सुमारे ८०० क्विंटल कापूस खरेदी जळगाव येथील केंद्रात झाली. भुसावळ व जामनेर येथेही केंद्र सुरू झाले. परंतु तेथे आवक नाही. एरंडोलातही मागील महिन्यात आवक झाली. नंतर आवक झाली नसल्याचे सांगण्यात आले.

शासकीय खरेदी केंद्र सुरू झाले, तेव्हापासून व्यापारी, खरेदीदारांनी कापसाची खेडा खरेदी केली. त्या वेळी किमान ५५०० रुपये प्रतिक्विंटलचा दर द्यायला सुरवात केली. हमीभावापेक्षा अधिक दर मिळत असल्याने शेतकरी गावातच कापसाची विक्री व्यापाऱ्यांना करीत आहेत. परिणामी शासकीय केंद्रात कापसाची आवक होत नसल्याचे सांगण्यात आले.