नगरमधील आठ तालुके अद्यापही रब्बी पेरणीविना

नगर ः नगर जिल्ह्यामध्ये रब्बीची आतापर्यंत अवघी नऊ टक्के क्षेत्रावर पेरणी झाली आहे. त्यात ज्वारीची ५९ हजार ११८ तर १६६ हेक्‍टरवर मकाची पेरणी झाली आहे. आठ तालुक्‍यांत मात्र गुंठाभरही पेरणी झाली नाही. यंदा रब्बीचे सरासरी क्षेत्र ६ लाख ६७ हजार २६० हेक्‍टर असून आतापर्यंत ६३ हजार २३७ हेक्‍टरवर पेरणी झाल्याची माहिती कृषी विभागाच्या सूत्रांनी दिली. पाऊस नाही, पाणीही उपलब्ध नाही, त्यामुळे रब्बी पेरणीचे क्षेत्र आता वाढेल याची शाश्‍वती संपली आहे.

जिल्ह्यात यंदा पावसाळ्याच्या सुरवातीपासूनच पुरेसा पाऊस झालेला नाही. त्याचा खरीप पिकांना मोठा फटका बसला. पावसाअभावी यंदा पाणी साठवण झाली नाही. परतीच्या पावसावर रब्बी हंगामातील पेरण्या अवलंबून असतात. यंदा मात्र परतीचा पाऊस झालाच नाही. पोळ्यापासूनच पाऊस गायब झाला. गणेशोत्सव, नवरात्र कोरडे गेले. भरवशाच्या हस्त नक्षत्रातही पाऊस झाली नाही. त्यामुळे यंदा रब्बी हंगाम धोक्‍यात आला आहे. आतापर्यंत रब्बीच्या सरासरी सत्तर टक्‍क्‍यांपेक्षा अधिक पेरण्या उरकलेल्या असतात. गव्हाच्या पेरणीलाही वेग येत असतो. यंदा मात्र परिस्थिती वेगळी आहे. आतापर्यत चौदा पैकी फक्त सहा तालुक्‍यांत पेरणी झाली आहे.

जेथे काही प्रमाणात पाणी आहे तेथे चारा पिके घेण्याला प्राधान्य दिले जात असून आतापर्यंत ३ हजार ४८० हेक्‍टर क्षेत्रावर चारा पिकांची पेरणी झाली आहे. दरवर्षी साधारण साधारण पंचवीस हजार हेक्‍टर क्षेत्रापर्यंत चारा पीके घेतली जात. यंदा चारा पिकांच्या पेरणीवरही पाऊस नसल्याचा परिणाम झाला आहे. आतापर्यंत रब्बीची नऊ टक्के पेरणी झालेली असली तरी त्यात आता अधिक भर पडेल याची शाश्‍वती नाही. अजूनही पारनेर, नेवासा, राहुरी, संगमनेर, अकोले, कोपरगाव, श्रीरामपूर, राहाता या आठ तालुक्‍यांत गुंठाभरही रब्बीची पेरणी झालेली नाही.

 पीकनिहाय पेरणी (कंसात एकूण सरासरी क्षेत्र)  ज्वारी    ः    ५९,११८ (४,६९,७८५)  मका    ः     १६६ (२७,२४५)  हरभरा     ः     ३,९४८ (१,१८,१०३)  सूर्यफूल    ः     ५ (८७)