म्हैसाळ योजना सुरू करण्यासाठी हालचाली नाहीत

सांगली ः जिल्ह्यातील ताकारी आणि टेंभू उपसा सिंचन योजना सुरू झाल्या. मात्र, म्हैसाळ उपसा सिंचन योजना अद्यापही सुरू झालेली नाही. ही योजना सुरू करण्यासाठी शेतकऱ्यांनी मागणीच केली नाही, असा दावा पाटबंधारे विभागाच्या अधिकाऱ्यांनी केला आहे. त्यामुळे ही योजना सुरू करण्यासाठी कोणत्याही हालचाली नाहीत. परंतु, गेल्या महिन्यात जिल्ह्यातील लोकप्रतिनिधी आणि शेतकऱ्यांची बैठक झाली, त्या बैठकीत ताकारी, टेंभू आणि म्हैसाळ उपसा सिंचन योजना सुरू करण्याचा निर्णय झाला होता. ताकारी आणि टेंभू उपसा सिंचन योजना सुरू झाल्या. मग म्हैसाळ योजना का सुरू झाली नाही, असा प्रश्‍न शेतकरी करू लागला आहे.

जिल्ह्यात यंदा पाऊस कमी असल्यामुळे यंदा सिंचन योजना तातडीने सुरू करा, अशी मागणी शेतकऱ्यांनी लावून धरली. त्यामुळे जिल्ह्यातील लोकप्रतिनिधी आणि कृष्णा खोरे महामंडळाचे उपाध्यक्षपद खासदार संजय पाटील यांनी बैठक घेतली. यामध्ये थकीत वीजबिलाचा प्रश्‍न मार्गी लागतो असे आश्‍वासन दिले. त्यानुसार मुख्यमंत्री देवेंद्र फडणवीस यांच्यासोबत बैठक घेण्यात आली. या बैठकीत थकीत वीजबिलाचा प्रश्‍न सोडवला. त्यानंतर ताकारी आणि टेंभू उपसा सिंचन योजना सुरू झाल्या. म्हैसाळ उपसा सिंचन योजना चार दिवसांत सुरू होणार, असे पाटबंधारे विभागाच्या अधिकाऱ्यांनी सांगितले होते. मात्र, अद्यापही ही योजना सुरू करण्यासाठी कोणत्याही हालचाली केलेल्या दिसत नाहीत.  

पाणीपट्टीच्या नव्या समीकरणानुसार शेतकऱ्यांनी पाणीपट्टीदेखील भरली आहे. म्हैसाळ उपसा सिंचन योजनेची सुमारे ३ कोटी रुपये पाणीपट्टी शेतकऱ्यांनी भरली आहे.  शेतकऱ्यांनी भरलेली रक्कम ही थकीत आहे, की सोडलेल्या आवर्तनाची असा घोळ निर्माण झाली असल्याची चर्चा सुरू आहे. मात्र, सध्या पाणीटंचाई असल्याने शेतकऱ्यांनी पाणी सोडण्याची मागणी केली आहे. मात्र, पाणी सोडण्यासाठी पाटबंधारे विभागाने दुर्लक्ष केले आहे.

म्हैसाळ सुरू होण्यासाठी मागणीच नाही सध्या पाणीटंचाई आहे. त्यामुळे म्हैसाळ उपसा सिंचन योजना सुरू व्हावी, लोकप्रतिनिधी आणि शेतकऱ्यांची मागणी आहे. जरी ही योजना सुरू होण्यासाठी लोकप्रतिनिधींनी पुढाकार घेतला असला तरी, शेतकऱ्यांनी पाण्याची मागणी केली नसल्याचे पाटबंधारे विभागाकडून सांगण्यात येते आहे. त्यामुळे ही योजना सुरू होण्यास विलंब होत असल्याचे चित्र आहे.