तेरा साखर कारखान्यांकडून  १९ लाख टन उसाचे गाळप 

सांगली ः जिल्ह्यातील १८ पैकी पाच साखर कारखान्यांचे गळीत हंगाम या वर्षी बंद राहिले आहेत. यामुळे सध्या तेरा कारखान्यांचे हंगाम सुरू असून, २० लाख ६६ हजार ६९२ टन उसाचे गाळप करून १९ लाख ९५ हजार क्विंटल साखरेचे उत्पादन घेतले आहे. सर्व कारखान्यांचा साखर उतारा सरासरी १०.४० टक्के आहे.  जिल्ह्यात सहकारी आणि खासगी, असे अठरा साखर कारखाने आहेत. व्यवस्थापनाच्या चुकीच्या कारभारामुळे महांकाली, माणगंगा या सहकारी साखर कारखान्यांसह केन ॲग्रो, यशवंत, तासगाव हे तीन खासगी साखर कारखान्यांचेही हंगाम सध्या बंद आहेत. उर्वरित तेरा कारखान्यांचे हंगाम जोमाने सुरू आहेत. जिल्ह्यात गेल्या चार ते पाच दिवसांपूर्वी मॉन्सूनोत्तर पावसाने हजेरी लावली. त्यामुळे ऊसतोडणी या पावसाचा व्यत्यय येत आहे. त्यामुळे गाळप हंगाम थोडासा मंदावला असल्याचे चित्र आहे. सध्या अजून देखील शेतात पाणी असल्याने ऊस तोडणी थांबली असून, येत्या चार ते पाच दिवसांत पुन्हा जोमाने ऊसतोडणी सुरू होईल.  या हंगामासाठी १ लाख २१ हजार ३८० हेक्टर उसाची कारखान्यांकडे नोंदणी आहे. एप्रिलपर्यंत हंगाम चालू राहण्याची शक्यता वर्तवली जात आहे. डॉ. पतंगराव कदम सोनहिरा साखर कारखान्याने सर्वाधिक २ लाख ४७ हजार टन उसाचे गाळप करून २ लाख ८६ हजार क्विंटल साखर उत्पादित केली आहे. या कारखान्याचा साखर उतारा ११.६० टक्के इतका आहे. तर जत तालुक्यातील राजारामबापू पाटील या युनिटने सर्वांत कमी उसाचे गाळप केले आहे. राजारामबापू पाटील जत युनिटने ८२ हजार टन उसाचे गाळप केले असून, ७४ हजार क्विंटल साखरेचे उत्पादन घेतले आहे.