नगरमधील छावण्यांतील तीन लाख पशुधनावर प्रतिदिन पावणेतीन कोटींचा खर्च

नगर : दुष्काळी स्थितीच्या पार्श्‍वभूमीवर पशुधन जगविण्यासाठी प्रशासनाने ५१० छावण्यांना मंजुरी दिली आहे. त्यातील ५०० छावण्या प्रत्यक्षात सुरू आहेत. यात तीन लाख १८ हजार २७४ जनावरे दाखल झाली आहेत. यावर सरकारचा प्रतिदिन दोन कोटी ६७ लाख १५ हजार १५० रुपये खर्च होत आहे.

गतवर्षी पावसाने दडी मारल्याने पाणी व चाराटंचाईचे तीव्र संकट निर्माण झाले. जिल्ह्यात लहान-मोठ्या जनावरांची संख्या २८ लाख आहे. यात १७ लाख दुभती जनावरे आहेत. पशुधनाला दिलासा देण्यासाठी प्रशासनाने राज्य सरकारकडे जिल्ह्यातील दुष्काळी स्थितीचा वस्तुनिष्ठ अहवाल पाठविला होता. त्याआधारेच २५ जानेवारीला छावण्या सुरू करण्यास राज्य सरकारने मंजुरी दिली. अटी व शर्तींच्या पूर्ततेनंतर तब्बल ५१० चाराछावण्यांना जिल्हाधिकारी राहुल द्विवेदी यांनी मंजुरी दिली. पशुधन जगविण्यासाठी सुरू केलेल्या या छावण्यांमध्ये सध्या ७० हजार पशुपालकांचा मुक्काम आहे.

प्रशासनाकडून खबरदारीच्या सर्व उपाययोजना केल्या जात आहेत. छावण्यांच्या तपासणीसाठी प्रशासनाने ३२ पथकांची नियुक्ती केली आहे. या पथकांच्या अहवालानुसार प्रशासनाने, पशुधनाच्या सेवेत कुचराई करणाऱ्या १३६ संस्थांना ४५ लाखांचा दंडही केला आहे. छावण्या चालविण्यासाठी चालकांचा मोठ्या प्रमाणात खर्च होत आहे. तसेच, पशुधनाच्या सेवेत अडचणी येऊ नयेत, यासाठी खबरदारी म्हणून छावणीचालकांना ५० टक्के खर्च थेट खात्यांवर वर्ग करण्यात आला आहे.