नांदेड जिल्ह्यात वीज पडून तिघांचा मृत्यू

नांदेड : जिल्ह्यात पूर्व मोसमी पावसाने मागील काही दिवसापासून तडाखा दिला आहे. या दरम्यान वीज पडून तिघांना जीव गमवावा लागला, तर चौघे जखमी झाले आहेत. तसेच लहान - मोठी १३ जनावरेही दगावली आहेत. उन्हाळी पिके, फळपिक व भाजीपाला नुकसानीबाबत माहिती मागविण्यात आल्याची माहिती जिल्हा प्रशासनाकडून मिळाली.

जिल्ह्यात मागील काही दिवसांपासून पूर्व मोसमी पावसाने तडाखा दिला आहे. यात वादळी वारे, गारपीट तसेच पावसाने झोडपून काढल्याने शेतीपिकासह भाजीपाला व फळपिकांचे नुकसान झाले आहे. अनेक ठिकाणी शेतकऱ्यांनी हळद शिजवून वाळवणीसाठी घातली होती. त्यावर पाणी पडल्याने शेतकऱ्यांची धावपळ झाली. 

दरम्यान, जिल्ह्यात मार्च, एप्रिलनंतर मे महिन्यातही पूर्व मोसमी पावसाने हजेरी लावली. अनेक ठिकाणी गारपीट झाली. वीज पडल्याच्या घटना समोर आल्या. यात मुखेड तालुक्यातील तुपदाळ खु. येथील रमेश पंढरीनाथ दोमाटे (वय ५५), नंदगाव (ता. किनवट) येथील विश्वनाथ नंदकुमार तरटे (वय २०) यांचा शुक्रवारी (ता. ७), तर मुदखेड तालुक्यातील मुगट येथील लक्ष्मीबाइ बालाजी वर्षेवार (वय २८) या महिलेचा रविवारी (ता. ९) वीज पडून मृत्यू झाला.

जखमींमध्ये मुगट (ता. मुदखेड) येथील रेणुका व्यंकटी वर्षेवार (वय ३), इंदूबाई बाबूराव लोखंडे (वय ५५), अर्चना दिलीप मुंडकर (वय २२) व डोंगरगाव (ता. लोहा) येथील विष्णू उत्तम राठोड यांचा समावेश आहे. मयत तसेच जखमी नागरिकांच्या कुटुंबांतील व्यक्तींना तातडीने मदत देण्यात येणार आहे.

  तेरा जनावरे दगावली

वादळी पावसामुळे शेतकऱ्यांच्या पशुधनाचेही नुकसान झाले आहे. यात वीज पडून जिल्ह्यातील लहान -मोठी १३ जनावरे मृत्यूमुखी पडली. यात गाय एक, सात म्हशी, दोन वासरे, तीन बैलांचा समावेश असल्याची माहिती जिल्हाधिकारी कार्यालयातील आपत्ती निवारण कक्षातून मिळाली. पशुपालकांना जिल्हा प्रशासनाकडून मदत देण्यात येणार आहे.