मालेगावातील तीन गावे प्रतिबंधित

मालेगाव, जि. नाशिक: ‘‘वैद्यकीय अधिकाऱ्यांच्या अहवालानुसार मालेगाव तालुक्यातील रावळगाव, लोणवाडे व चंदनपुरी शिवारातील मडकी महादेव वस्तीच्या परिसर शासनाच्या मार्गदर्शक सूचनांनुसार प्रतिबंधीत क्षेत्र म्हणून घोषित करण्यात आले आहे, असे उपविभागीय दंडाधिकारी विजयानंद शर्मा यांनी जाहीर केले. 

कोरोना विषाणूची लागण झालेले रुग्ण ज्या ठिकाणी राहतात, ते ठिकाण केंद्र बिंदू घोषित करून त्यापासून १ किलोमीटर अंतरातील परिघाचे क्षेत्र हे प्रतिबंधित क्षेत्र म्हणून घोषित करण्यात येत आहे. तर, त्यास लागून ३ किलामीटर परिघातील क्षेत्र हे बफरझोन म्हणून घोषित करण्यात येत असल्याचे आदेशात नमूद कले आहे. या क्षेत्रात पूर्णपणे संचारबंदी लागू राहील. 

या क्षेत्रात प्रवेश आणि निर्गमन करण्यास बंदी असेल. मात्र, अत्यावश्यक सेवेची दुकाने, आस्थापना जसे किराणा दुकाने, भाजीपाला, दवाखाने, मेडिकल, दुध डेअरी यांना निर्धारित करून दिलेल्या वेळेत मुभा देण्यात आली आहे. या ठिकाणी शासनाच्या नियमाप्रमाणे सुरक्षित अंतर पाळणे आवश्यक राहील. या परिसरातील नागरिकांना सुरक्षेसाठी मास्कचा वापर बंधनकारक राहील, असेही या आदेशात नमूद करण्यात आले आहे. 

संक्रमणाचा पुढील प्रसार रोखण्यासाठी वैद्यकीय पथकांच्या निर्देशांचे पालन करावे. संबंधित स्थानिक स्वराज्य संस्थेव्दारे या परिसरातील संपूर्ण स्वच्छता करुन अहवाल सादर करावा. नियुक्त करण्यात आलेल्या चेकपोस्टसह संबंधित पथकातील सर्व अधिकारी, कर्मचाऱ्यांनी कामकाज करतांना वैयक्तिक सुरक्षा उपकरणे आणि शासनाच्या आरोग्य विभागाचे मार्गदर्शक सूचनांचे पालन करावे, अशा सुचनाही देण्यात आल्या आहेत.