नांदेड, परभणी, हिंगोली जिल्ह्यात फुले शेतातच फेकून देण्याची वेळ

नांदेड : ‘लॅाकडाऊन’मुळे नांदेडसह अन्य ठिकाणच्या फुलांच्या मार्केटमधील खरेदी- विक्रीचे व्यवहार ठप्प आहेत. दरवर्षी गुढीपाडव्याला फुले आणि हारांच्या विक्रीतून मोठी उलाढाल होते. परंतु, यंदा मार्केट बंद राहिल्याने फुले तोडून शेतातच फेकून देण्याची वेळ शेतकऱ्यांवर आली आहे. नांदेड, परभणी, हिंगोली जिल्ह्यातील फुल उत्पादक शेतकऱ्यांचे लाखो रुपयांचे उत्पन्न बुडाले आहे. 

‘कोरोना’चा प्रसार रोखण्यासाठीच्या उपाययोजनांतर्गंत लग्न समारंभ, धार्मिक कार्यक्रम, जत्रा, सभा, परिषदा आदी कार्यक्रम बंद करण्यात आले. त्याचा परिणाम नांदेडसह अन्य ठिकाणच्या फुलांच्या मार्केटमधील खरेदी- विक्रीच्या व्यवहारावर झाला आहे. गेल्या १५ दिवसांपासून लॅाकडाऊन आहे. त्यामुळे फुलांचे मार्केट बंद आहे. एस.टी, रेल्वे वाहतूक बंद आहे. त्यामुळे नांदेड, अर्धापूर, मुदखेड, उमरी आदी तालुक्यांतील गुलाब तसेच अन्य फुल उत्पादक शेतकऱ्यांच्या अडचणी वाढल्या आहेत. 

गुढीपाडव्याला गुलाब, गलांडा, मोगरा, काकडा आदी फुलांसह त्यांच्या हारांना मोठी मागणी असते. चांगले दरही मिळतात. परभणी जिल्ह्यातील परभणी, सेलू, मानवत आदी, हिंगोली जिल्ह्यातील वसमत, औंढानागनाथ, कळमनुरी, हिंगोली, सेनगाव आदी तालुक्यातील अनेक शेतकरी गुलाब, गलांडा, मोगरा, लिली, निशिगंध आदी फुलांचे उत्पादन घेतात. ‘लॅाकडाऊन’मुळे शेतकऱ्यांना फुले फेकून द्यावी लागत आहेत. त्यांचे दररोजचे हजारो रुपयांचे उत्पन्न बुडत आहे.