जिल्हा बँकेचे थकलेले  कोट्यवधींचे कर्ज वसूल करा 

चिखली, जि. बुलडाणा : शासनाने केलेल्या कर्जमाफीचा अपेक्षित फायदा शेतकऱ्यांना झालेला नाही. यासाठी जिल्हा सहकारी बँकेचे थकीत असलेले कोट्यवधी रुपयांचे कर्ज मोठ्या थकबाकीदारांकडून तत्काळ वसूल करण्याची आवश्यकता असल्याची मागणी आमदार श्‍वेता महाले यांनी केली. सोमवारी (ता. तीन) आयोजित जिल्हा खरीप आढावा बैठकीत त्या बोलत होत्या. या बैठकीत पालकमंत्री डॉ. राजेंद्र शिंगणे यांच्यासह इतर उपस्थित होते. 

या वेळी महाले म्हणाल्या, ‘‘जिल्हा बँकेच्या थकबाकीदारांकडे ५० कोटी रुपयांपेक्षा अधिक रकमेची थकबाकी चिखली मतदारसंघात आहे. सदर थकबाकीमुळे जिल्हा बँक अडचणीत आली व विविध कार्यकारी संस्था बंद पडल्या.

विविध कार्यकारी संस्था बंद पडल्यामुळे कर्ज वाटपाची सगळी जबाबदारी राष्ट्रीयकृत बँकांवर येऊन पडली. एक शाखा दररोज केवळ ५० शेतकऱ्यांना कर्ज वाटू शकते. पूर्वी प्रत्येक गावात विविध कार्यकारी सोसायट्या होत्या. सोसायट्यांमार्फत सहा ते सात दिवसांत संपूर्ण गावकऱ्यांना कर्जाचे वाटप होत असे, परंतु काही थकबाकीदारांकडून वसुली होत नसल्याने जिल्हा बँक अडचणीत आलेली आहे.

थकीत कर्ज न भरल्यामुळे चिखली विधानसभा मतदारसंघातील शेतकऱ्यांना कर्ज मिळाल्यापासून वंचित राहावे लागत आहे. ही परिस्थिती बदलायची असेल तर तत्काळ श्रीमंत थकबाकीदारांकडून कर्जाची वसुली करा, अशी मागणी केली. आमदार महाले यांनी उपस्थित केलेल्या प्रश्नावर पालकमंत्री डॉ. शिंगणे यांनी दखल घेत बड्या थकबाकीदारांकडून तत्काळ कर्ज वसूल करण्यासाठी प्रयत्न करा, अशा सूचना संबंधित अधिकाऱ्यांना दिल्या आहेत.  थकबाकीदारांमुळे लाखो शेतकरी अडचणीत येत असतील तर ही बाब योग्य नाही, असेही ते पुढे म्हणाले.