राज्यात विजा, मेघगर्जनांसह पावसाची शक्यता

पुणे : राज्यात पावसासाठी पोषक हवामान होत असल्याने आजपासून (ता. २) विदर्भ, मध्य महाराष्ट्र, मराठवाड्यात विजा मेघगर्जनांसह पावसाची शक्यता आहे. कोकणात तुरळक ठिकाणी जोरदार पावसाचा इशाराही हवामान विभागाने दिला आहे.   बिहार आणि परिसरावर हवेचे कमी दाबाचे क्षेत्र सक्रिय आहे. पूर्वेकडून वाहणाऱ्या वाऱ्यामुळे बंगालच्या उपसागरापासून तमिळनाडूच्या किनाऱ्यापर्यंत हवेचा कमी दाबाचा पट्टा तयार झाला आहे. पावसाला पोषक हवामान झाल्याने कोकणातील ठाणे आणि रायगड जिल्ह्यात तुरळक ठिकाणी जोरदार पाऊस पडला. उर्वरित राज्यात मुख्यतः कोरडे हवामान होते. बुधवारनंतरच मॉन्सूनचा परतीचा प्रवास  अरबी समुद्रातील शाहीन चक्रीवादळ निवळल्यानंतर मंगळवारपासून (ता. ५) देशाच्या वायव्य भागात वाऱ्याची दिशा बदलणार असून, आर्द्रतेती टक्केवारी चांगलीच कमी होण्याचे संकेत आहेत. या भागात मुख्यतः कोरडे हवामान होणार असल्याने बुधवारपासून (ता. ६) मॉन्सूनच्या परतीच्या प्रवासाला पोषक हवामान तयार होणार असल्याचे हवामान विभागाने स्पष्ट केले आहे.

जोरदार पावसाचा इशारा (येलो अलर्ट) कोकण : रायगड, रत्नागिरी. विजा, मेघगर्जनेसह पावसाचा इशारा (येलो अलर्ट) मध्य महाराष्ट्र : नाशिक, नगर, पुणे, सातारा, सांगली, सोलापूर, कोल्हापूर. मराठवाडा : बीड, परभणी, उस्मानाबाद, लातूर.  विदर्भ : बुलडाणा, अकोला, वाशीम, अमरावती, यवतमाळ, वर्धा, नागपूर, चंद्रपूर.