परभणीत एक टनावर भाजीपाला, फळांची विक्री

परभणी : ‘लॅाकडाऊन’च्या काळात शेतकऱ्यांना फळे, भाजीपाला विक्री करण्यासाठी कृषी विभागातर्फे (आत्मा) ‘शेतकरी ते ग्राहक’ या उपक्रम राबविला जात आहे. जिल्ह्यातील ८४ शेतकरी गटांनी शनिवार (ता.२८) ते मंगळवार (ता.७) या कालावधीत ९५ ठिकाणी ३ हजार ३५१ क्विंटल भाजीपाला, फळांची विक्री केली, अशी माहिती सूत्रांनी दिली. 

‘लॅाकडाऊन’मुळे शेतकऱ्यांना भाजीपाला, फळांच्या विक्रीस येणाऱ्या अडचणी सोडविण्यासाठी जिल्हा अधीक्षक कृषी अधिकारी संतोष आळसे, जिल्हा उपनिबंधक (सहकारी संस्था) मंगेश सुरवसे, ‘आत्मा’चे उपसंचालक के. आर. सराफ, ‘पणन’चे जिल्हा व्यवस्थापक पंकज चाटे यांच्या मार्गदर्शनाखाली ‘आत्मा’अंतर्गंत शेतकरी गट स्थापन केले आहेत. शनिवार (ता.२८) पासून जिल्ह्यात ‘शेतकरी ते ग्राहक’ भाजीपाला विक्रीस सुरुवात झाली आहे. पहिल्या दिवशी २५ गटांनी जिल्ह्यातील १५ ठिकाणी ७० क्विंटल भाजीपाला, फळांची विक्री केली. 

मंगळवार (ता.७) पर्यंत शेतकरी, शेतकरी गटांची संख्या ८४ पर्यंत वाढली आहे. परभणी तालुक्यातील ३, जिंतूरमधील २७, सेलूतील ६, मानवतमधील १६, पाथरीतील ४, मानवतमधील १६, सोनपेठमधील ५, गंगाखेडमधील ७, पालममधील ८, तर पूर्णा तालुक्यातील ८ शेतकरी गट अशा एकूण ८४ गटांतर्फे ९५ ठिकाणी ३ हजार ३५१ क्विंटल भाजीपाला, फळांची विक्री केली आहे. वर्णेश्वर शेतकरी उत्पादक कंपनीतर्फे शनिवार (ता.४) पासून परभणी शहरातील शिवाजी नगर आणि कल्याण नगरयेथे भाजीपाल्याची विक्री केली जात आहे. 

दहा वाहन परवाने वितरित 

कृषी विभाग, ‘आत्मा’तर्फे अर्ज केलेल्यांना प्रादेशिक परिवहन अधिकारी कार्यालयाकडून शेतमाल वाहतुकीसाठी ई पास दिले जात आहेत. आजवर जीवनावश्यक वस्तुच्या वाहतुकीसाठी २३० वाहन परवाने देण्यात आले आहेत. ‘आत्मा’अंतर्गंत शेतकरी, शेतकरी गटांना १० वाहन परवाने देण्यात आले. भाजीपाला-फळे विक्री करणाऱ्या शेतकऱ्यांना परवाने देण्याची प्रक्रिया गतीमान आणि सुलभ करण्याची गरज आहे.