सांगली जिल्ह्यात द्यापही तूर खरेदी सुरू नाही...

सांगली : शासनाने हमीभावाने तूर खरेदी करण्यासाठी येथील बाजार समितीच्या आवारात खरेदी केंद्र सुरू केले. आजअखेर २५० हून अधिक शेतकऱ्यांनी तूर विक्रीसाठी नोंदणी केली आहे. अद्यापही तूर खरेदी सुरू झाली नाही. त्यामुळे ती कधी सुरू करणार, असा प्रश्न शेतकऱ्यांनी उपस्थित केला आहे. या भागातील तूर काढून झाली आहे. शेतकऱ्यांनी घरात पोत्यांची रास करून ठेवली आहे.

शेतकऱ्यांच्या शेतीमाला योग्य भाव मिळावा, यासाठी शासनाने शेतीमालाला हमीभाव देण्याचा निर्णय घेतला. यानुसार मका, सोयाबीन, तूर आदी शेतीमालाचे हमीभाव निश्चित केले. तूर ज्या शेतकऱ्यांना विक्री करायची आहे, अशा शेतकऱ्यांनी नोंदणी करण्याचे आवाहन केले होते. त्यानुसार जिल्ह्यातील सुमारे २५० हून अधिक शेतकऱ्यांनी नोंदणी केली. त्यानंतर खरेदी करताना प्रत्येक शेतकऱ्यांना तूर विक्रीसाठी यावे, असे सांगण्यात येणार आहे. मात्र, खरेदीबाबत अद्यापही कोणत्याही शेतकऱ्यांना निरोप दिला नाही. त्यामुळे शेतकरी संभ्रमात आहेत.

शासनाने तुरीला पाच हजार ८०० रुपये हमीभाव दिला आहे. खानापूर, आटपाडी, जत, कवठेमहांकाळ या भागांत मोठ्या प्रमाणात तुरीचे पीक घेतले जाते. या भागातील तूर काढून झाली आहे. शेतकऱ्यांनी घरात पोत्यांची रास करून ठेवली आहे. तुरीची अधिक काळ साठवण केली, तर त्याला कीड लागण्याची शक्यता आहे.

त्याचबरोबर तूर विक्री केल्यानंतर कर्ज भरावे लागणार आहे.  त्यामुळे स्थानिक बाजार पेठेत विक्री केल्याशिवाय दुसरा पर्याय नाही. तिथे तुरीला प्रतिक्विंटल साडेचार ते पाच हजार असा दर आहे. त्यामुळे पाचशे ते एक हजार ३०० रुपयांचा तोटा सहन करावा लागत आहे. तुरीची कधी खरेदी होते, याचीच प्रतीक्षा शेतकऱ्यांना आहे.