कमी दरात तूर घेऊन विकली हमीभावाने; दोन व्यापाऱ्यांना अटक

यवतमाळ ः गेल्या हंगामात शेतकऱ्यांकडून कमी दरात तुरीची खरेदी करून त्याची शासकीय केंद्रावर हमीभावाने विक्री करणाऱ्या दोघा व्यापाऱ्यांना पोलिसांनी अटक केली. तब्बल एक कोटी ४१ लाख ८२ हजार ८६३ रुपयांची फसवणूक या प्रकरणात शासनाची करण्यात आली.  धर्मेद्र ढोले (रा. नातूवाडी, दारव्हा), महेश ऊर्फ महेश्‍वर भोयर (रा. शेलोडी, दारव्हा) अशी या व्यापाऱ्यांची नावे आहेत. या प्रकरणी जिल्हा उपनिबंधक तथा प्रभारी मार्केटिंग अधिकाऱ्यांनी १३ ऑक्‍टोंबर २०१८ रोजी दारव्हा पोलिसात तक्रार दिली होती. तक्रारीनुसार, दारव्हा तालुक्‍यातील धर्मेंद्र ढोले आणि महेश ऊर्फ महेश्‍वर भोयर या दोन व्यापाऱ्यांनी तालुक्‍यातील शेतकऱ्यांकडून कमी किमतीमध्ये तुरीची खरेदी केली. त्यानंतर ती तूर दारव्हा बाजार समिती आणि खरेदी-विक्री संघात नाफेडला जादा दराने विकली. या माध्यमातून शासनाची १ कोटी ४१ लाख ८२ हजार रुपयांची फसवणूक केल्याचेही तक्रारीत म्हटले होते. या प्रकरणी दारव्हा पोलिसात या दोघांविरोधात गुन्हे दाखल करण्यात आले. परंतु, त्यानंतर आरोपींनी सत्र न्यायलायात जामिनासाठी अर्ज केला होता. तो फेटाळण्यात आला. तेव्हापासून दोन्ही व्यापारी फरार होते. त्यांच्या अटकेचे आदेश पोलिस अधीक्षक एम. राजकुमार यांनी गुन्हे शाखेला दिले होते. त्यानुसार आर्थिक गुन्हे शाखेचे प्रमुख सहायक पोलिस निरीक्षक राहुलकुमार राऊत यांनी आरोपींची शोधमोहीम राबवीत त्यांना अटक केली.