मर्जीनेच स्थलांतरित केले कृषी कार्यालय

वर्धा ः कोणताही शासकीय आदेश नसताना स्वमर्जीनेच आष्टी (शहीद) येथे सुरू असलेले मंडळ कृषी अधिकारी कार्यालय हलविण्यात आले. शेतकऱ्यांनी याचा तीव्र विरोध करीत हे कार्यालय पूर्वीप्रमाणे आष्टीमध्ये सुरू न झाल्यास कुलूपबंद करण्याचा इशारा दिला आहे.  मंडळ कृषी अधिकारी कार्यालय वर्षभरापूर्वी आष्टी येथे सुरू करण्यात आले. सदरचे कार्यालय वरिष्ठ तसेच प्रशासकीयस्तरावर कोणाचीच परवानगी न घेता स्थलांतरित करण्यात आले. मंडळ कृषी अधिकारी जे. व्ही. घरत यांनी स्वतःच्या मर्जीनेच कार्यालय तळेगाव येथे स्थलांतरित केल्याचा आरोप आहे. तालुका व उपविभागीय कृषी अधिकारी यांच्या लक्षात हा प्रकार येताच त्यांनी मंडळ कृषी अधिकारी घरत यांना यासंदर्भाने जाब विचारला.  आष्टी तालुक्‍यातील शेतकऱ्यांपर्यंत हे गंभीर प्रकरण पोचल्यानंतर त्यांनी तालुका कृषी अधिकारी एम. जे. तोडकर यांना लेखी निवेदन दिले. मंडळ कृषी अधिकारी कार्यालय आष्टीला सुरू न झाल्यास तीव्र आंदोलनाचा इशारा यातून देण्यात आला आहे.  मंडळ कृषी अधिकारी कार्यालय कुलूपबंद करण्याच्या इशाऱ्याचा देखील शेतकऱ्यांनी दिला. निरज भार्गव, साकीब खान, अंकुश पोकळे, दीपक डाखोळे, मुकेश चाफले, रवी सोनोने, वकार  अहमद, अभिजीत जयस्वाल, लोकेश सव्वालाखे या शेतकऱ्यांनी याविषयी निवेदन दिले. याप्रकरणी वरिष्ठ  स्तरावरून घरत यांच्याविरोधात काय कारवाई होते, याकडे शेतकऱ्यांचे लक्ष्य लागले आहे.