गिरणा परिसरात कांदा लागवडीकडे कल

मेहुणबारे, जि. जळगाव  ः चाळीसगाव तालुक्‍यात या वर्षी समाधानकारक पाऊस झाल्याने विहिरींना चांगले पाणी उपलब्ध आहे. त्यामुळे बहुतांश शेतकरी कांदा पिकाकडे वळले आहेत. फेब्रुवारीच्या सुरुवातीला जवळपास सहा हजार हेक्‍टर क्षेत्रावर उन्हाळी कांद्याची लागवड झाली आहे. त्यामुळे मागील वर्षापेक्षा यंदा चार हजार हेक्‍टर जास्तीच्या क्षेत्रावर कांदा लागवड झाल्याचे तालुका कृषी कार्यालयातील नोंदींवरून दिसून येत आहे. कांद्यांना चांगले भाव असल्याने शेतकऱ्यांच्या अपेक्षा उंचावल्या आहेत. त्यामुळे कांदा लागवडीच्या क्षेत्रात आणखी वाढ होण्याची शक्‍यता आहे.  चाळीसगाव तालुक्‍यात या वर्षी पाऊस चांगला झाल्याने बेभरवशाचे पीक असलेल्या कांद्याला पुरेसे पाणी उपलब्ध झाले आहे. अवकाळी पावसाचा फटका बसलेले शेतकऱ्यांनीही यंदा कांदा लागवडीवर भर दिलेला आहे. तालुक्‍यात मागील वर्षी १५०० हेक्‍टरवर उन्हाळी काद्यांची लागवड झाली होती. या वर्षी ही लागवड वाढली असून, तालुका कृषी कार्यालयाकडे उपलब्ध असलेल्या माहितीनुसार, सहा हजार हेक्‍टरवर उन्हाळी कांदा लागवड झाली आहे. तालुक्‍याचे एकूण क्षेत्र ९५ हजार हेक्‍टर असून, यात ऊस, मका, केळी आदी पिकांचा समावेश आहे. सततची दुष्काळी परिस्थिती, पाण्याचे दुर्भिक्ष यामुळे इतर पिकांबरोबरच बागायती पिकांनाही धोका निर्माण झाला होता. कांद्याला सध्या बाजारात मोठी मागणी आहे. यामुळे लागवड वाढली आहे. हवी तशी शी थंडी  पडली नाही. आताही कधी ढगाळ तर कधी दमट वातावरण असते. अशा बदलत्या वातावरणामुळे कांद्यांच्या उगवण शक्तीवर काही भागात विपरीत परिणाम झाल्याचे दिसून येत आहे. अशा स्थितीत कृषी विभागाने त्यांना मार्गदर्शन करावे, अशी मागणी होत आहे.