नांदेड जिल्ह्यात तूर उत्पादकता सरासरीपेक्षा कमी 

नांदेड  ः नांदेड जिल्ह्यात २०१८-१९ मधील खरीप हंगामातील तुरीची प्रतिहेक्टरी सरासरी उत्पादकता ५ क्विंटल ९ किलो (एकरी २.०३ क्विंटल) आली आहे. संयुक्त पीककापणी प्रयोगांच्या निष्कर्षांच्या विश्लेषणानंतर ही स्थिती स्पष्ट झाली. यंदा जिल्ह्यात तुरीची सरासरी उत्पादकता गेल्या ५ वर्षांतील सरासरी उत्पादकतेपेक्षा कमी आली आहे. १६ पैकी ११ तालुक्यांची उत्पादकता सरासरीपेक्षा कमी, तर ५ तालुक्यांची उत्पादकता सरासरीपेक्षा अधिक आल्याचे आढळले आहे, अशी माहिती कृषी विभागाच्या सूत्रांनी माहिती दिली.

नांदेड जिल्ह्यात तुरीची उत्पादकता निश्चित करण्यासाठी कृषी, महसूल, ग्रामविकास विभाग यांच्यातर्फे सर्व १६ तालुक्यांमध्ये २७६ पीककापणी प्रयोगांचे आयोजन करण्यात आले होते. या प्रयोगाच्या निष्कर्षांच्या विश्लेषणानंतर जिल्ह्यातील तुरीची प्रतिहेक्टरी सरासरी उत्पादकता ५ क्विंटल ९ किलो (एकरी २.०३ क्विंटल) आली असल्याचे आढळले आहे. 

२०१३ ते २०१७ या पाच वर्षांतील तुरीची प्रतिहेक्टरी सरासरी उत्पादकता ६.३३ क्विंटल आहे. यंदा जिल्ह्यात प्रतिहेक्टरी सरासरी उत्पादकता सरासरी उत्पादकतेपेक्षा कमी आली आहे, परंतु अर्धापूर, माहूर, भोकर, बिलोली, कंधार या ५ तालुक्यांमधील उत्पादकता सरासरीच्या तुलनेत किमान ८ किलो ते कमाल २२.१३ क्विंटलने जास्त आली आहे.

मात्र अल्प तसेच लवकर उघडलेल्या पावसामुळे सिंचनासाठी पाणी उपलब्ध नसलेल्या जमिनीवरील तसेच कोरडवाहू क्षेत्रातील नांदेड, मुदखेड, हदगाव, किनवट, हिमायतनगर, उमरी, धर्माबाद, नायगाव, देगलूर, मुखेड, लोहा या ११ तालुक्यांतील तुरीची हेक्टरी उत्पादकता सरासरीपेक्षा १.०७ ते ५.३१ क्विंटलने कमी आली आहे. देगलूर तालुक्यात तूर उत्पादकतेत ५.३१ क्विंटलने घट झाली आहे. यंदा अर्धापूर तालुक्यातील तुरीची प्रतिहेक्टरी उत्पादकता सर्वाधिक २९.७० क्विंटल (एकरी ११.८८ क्विंटल), तर किनवट आणि उमरी तालुक्याची हेक्टरी उत्पादकता सर्वांत कमी म्हणजे प्रत्येकी १.६६ क्विंटल (एकरी ६६ किलो) आली आहे.