तीस कोटींची हळद विक्रीविना पडून

सांगली : यंदाच्या हंगामात बाजार समितीत आज अखेर अंदाजे १३ लाख पोत्यांची विक्री झाली असून एक लाख पोत्यांची थेट शेतकऱ्यांच्या बांधावरून विक्री झाली. तर, एक लाख पोती शेतकऱ्यांकडे शिल्लक आहेत. शेतकऱ्यांकडे शिल्लक असलेल्या हळदीची रक्कम जवळपास तीस कोटी आहे. सध्या ऊन-पावसाचे वातावरण असल्याने हळदीच्या दर्जावर परिणाम होण्याची भीती आहे. जिल्ह्यातील हळदीची बाजार पेठ सुरु झाल्यानंतर अवघ्या काही दिवसांत कोरोना विषाणूमुळे बंद झाली. सुमारे अडीच ते तीन महिने व्यापार बंद होता.  

परंतु सौदे पुन्हा सुरु झाल्यानंतर सुरुवातीला ई-नामच्या माध्यमातून झाले. त्यानंतर नेहमीप्रमाणे सौद्यांना प्रारंभ झाला. परंतु शहरात कोरोनाचा प्रादुर्भाव वाढू लागल्याने लागू केलेल्या लॉकडाउनचा परिणाम बाजारपेठेवर झाला. परिणामी हळदीची विक्री करण्यात देखील अडचणी येत आहेत.  बाजारात हळदीला अपेक्षित दर मिळत नाही. त्यामुळे शेतकऱ्यांनी हळद विक्रीसाठी न काढता घरीच साठवणूक केली आहे. सध्या कधी ऊन तर कधी पाऊस यामुळे हळदीला डंखाचा प्रादुर्भाव होण्याची शक्यता आहे. परिणामी हळदीच्या दर्जावर परिणाम होण्याची भिती आहे. त्यामुळे हळद उत्पादक शेतकरी हवालदिल झाला आहे.

थेट बांधावरूनही खरेदी वास्तविक पाहता गेल्यावर्षापासून हळद खरेदीचा नवीन ट्रेंड आला आहे. कोचीन आणि बेंगलूर या भागातून अनेक व्यापारी राज्यात येतात शेतकऱ्यांच्या थेट बांधावर खरेदीसाठी जातात. जागेवर पैसे देऊन हळदीची खरेदी केली जाते. गतवर्षी राज्यातील उत्पादनाच्या १० टक्के हळदीची खरेदी शेतावर झाली होती. तर यंदा २० टक्के हळदीची खरेदी शेतातच झाली आहे, अशी माहिती हळद उद्योगातील जाणकारांनी सांगितले.

प्रतिक्रिया यंदा कोरोनाच्या संकटामुळे स्थानिक हळदीची विक्री अधिक झाली आहे. परंतु सध्या एक लाख हळदीची पोती शेतकऱ्यांच्या घरात तर ५० हजार पोती व्यापाऱ्यांकडे  असून या वातावरणामुळे डंखाचा प्रादुर्भाव होण्याची शक्यता आहे. — गोपाळ मर्दा,  हळद व्यापारी सांगली.