सांगली मार्केट यार्डात हळद-गूळ सौद्यांना प्रारंभ

सांगली : येथील कृषी उत्पन्न बाजार समितीमध्ये दिवाळी पाडव्याच्या मुहूर्तावर गूळ आणि हळदीच्या नवीन हंगामाच्या सौद्यांना प्रारंभ झाला. मुहूर्ताच्या सौद्यात गुळाला उच्चांकी ३९५१ रुपये प्रति क्विंटल दर मिळाला. तर हळदीला साडेआठ हजार ते नऊ हजार रुपये प्रति क्विंटल दर मिळाला. मुहूर्ताच्या सौद्यात चांगला दर मिळाल्याने शेतकऱ्यांमध्ये उत्साहाचे वातावरण होते.

मार्केट यार्डात प्रतिवर्षी दिवाळी पाडव्याच्या मुहूर्तावर गूळ आणि हळदीच्या नवीन हंगामाच्या सौद्यांना प्रारंभ होतो. मुहूर्ताच्या सौद्याकडे शेतकरी, व्यापारी आदींचे लक्ष लागलेले असते. बाजार समितीचे सभापती दिनकर पाटील यांच्या हस्ते या सौद्यांचा प्रारंभ झाला. सौद्यात गुळाला उच्चांकी ३९५१ रुपये प्रति क्विंटल इतका दर मिळाला. गुळाचा दर पहिल्याच सौद्याला ३४०० ते ३९५१ रुपये इतका राहिला. पहिल्या दिवशी १५०० पोत्यांचे सौदे झाले. हळदीच्या सौद्यालाही उत्साहात सुरवात झाली. हळदीला सहा हजार ते नऊ हजार रुपये प्रति क्विंटलइतका दर मिळाला. मुहूर्तावर बेदाणा सौद्यास देखील प्रारंभ झाला.

सभापती श्री. पाटील, सचिव महेश चव्हाण, चेंबर ऑफ कॉमर्सचे अध्यक्ष शरद शहा, गूळ व्यापारी संघटनेचे हरीश पाटील, हळद व्यापारी सतीश पटेल, मनोहर सारडा, गोपाळ मर्दा, शरद पाटील, बेदाणा व्यापारी संघटनेचे अध्यक्ष राजेंद्र कुंभार, मनोज मालू, शेखर ठक्कर, पणू सारडा, रूपेश पारेख, अभिजित पाटील आदींसह अडते, व्यापारी, शेतकरी, खरेदीदार, हमाल उपस्थित होते.