महापुराने हळद काळवंडली

सांगली : दोन महिन्याचं हळदीचं पीक होतं. नदीचं पाणी शेतात आलं. शेतानं तळ्याचं रूप धारण केलं. त्यामुळे हळद काळवंडली. पिकावर आत्तापर्यंत दोन लाख रुपये खर्च केला होता. घातलेला पैसाही आता मिळणार नाही, अशी व्यथा हळद उत्पादक शेतकरी सांगत होते. अतिपावसाचा फटका हळद पिकाला बसला असून, जिल्ह्यातील सुमारे २० टक्के हळदीचे नुकसान झाले आहे.  जिल्ह्यात दरवर्षी अक्षय तृतीयेपासून हळद लागवडीस प्रारंभ होतो. सुरवातीच्या काळात पाऊस नसल्याने हळदीची लागवड उशिरा झाली. त्यानंतर शेतकरी पावसाची प्रतीक्षा करत होते. ऑगस्टच्या पहिल्या दिवसापासून जिल्ह्यात पावसाने जोर धरला. त्यामुळे शेतकरी समाधानी झाला. परंतु पावसाचा जोर वाढतच राहिल्याने शेतकरी चिंतातुर झाला. नदीकाठी असलेली हळद पाण्याच्या प्रवाहाबरोबर वाहून गेली. शेतात पाच ते सहा दिवस पाणी साचल्याने पीक कुजून गेले. शेतकऱ्यांनी हजारो रुपये खर्च केले आणि पीक वाया गेल्याने आता करायचे काय, असा प्रश्न शेतकऱ्यापुढे निर्माण झाला आहे. अनेक भागांतील शेतकऱ्यांनी पिकात साचलेले पाणी काढून दिल्याने पाण्याचा निचरा झाला. त्या ठिकाणची हळद पीक वाचले आहे. परंतु कंद कूज यांसह विविध रोगांचा प्रादुर्भाव होण्याची शक्यता आहे. त्यामुळे पुन्हा शेतकऱ्यांना आर्थिक खर्च करावा लागणार आहे. 

उत्पादनात मोठ्या घटीची शक्यता जिल्ह्यात सरासरी एक हजार हेक्टरवर हळदीची लागवड क्षेत्र असून, त्यातून सरासरी ६ हजार टन उत्पादन मिळते. यंदा हळदीची लागवड १ हजार ४०० हेक्टर वर झाली असल्याचे हळद संशोधन केंद्राने सांगितले. महापुराचा फटका हळदीला बसल्याने या हंगामात हळदीचे सुमारे २० टक्के नुकसान असल्याने हळदीच्या उत्पादनात घट होण्याची शक्यता हळद उद्योगातील तज्ज्ञांनी व्यक्त केली आहे.