सांगली ः सध्या देशभरात देशात हळदीची ३७ लाख पोती शिल्लक आहेत, तरीही हळदीचे दर स्थिर असून, प्रति क्विंटल ५ ते ८ हजार रुपये, असा दर मिळत आहे. हळदीची निर्यात देखील चांगली होत आहे. हळद उत्पादन घेणाऱ्या भागांत अतिवृष्टी झाल्याने यंदा देशात हळदीच्या उत्पादनात १० टक्क्यांनी घट होण्याचा प्राथमिक अंदाज हळद उद्योगातील जाणकांनी व्यक्त केला आहे. देशात दर वर्षी ८० ते ९० लाख पोती (एक पोते ५० किलोचे) हळदीचे उत्पादन होते. जानेवारीच्या दुसऱ्या आठवड्यापासून नव्या हळदीच्या काढणीस प्रारंभ होईल. गेल्या वर्षभरापासून देश आणि परदेशात हळदीची मागणी वाढली आहे. त्यामुळे हळदीचा अपेक्षित उठाव झाला आहे. सध्या व्यापारी आणि शेतकऱ्यांकडे हळदीची ३७ लाख पोती शिल्लक आहेत. गत वर्षी नोव्हेंबरच्या शेवटच्या आठवड्याअखेर ३५ लाख पोती शिल्लक होती. वास्तविक पाहता यंदा दोन लाख पोती अधिक शिल्लक आहेत. डिसेंबर ते फेब्रुवारी अखेर शिल्लक राहिलेल्या हळदीची विक्री मोठ्या प्रमाणात होईल, असा अंदाज व्यापारी वर्गाने व्यक्त केला आहे. अर्थात, या तीन महिन्यांत सुमारे १२ ते १५ लाख पोत्यांची विक्री होईल. म्हणजे २२ ते २५ लाख पोती जुन्या हळदीची पोती शिल्लक राहतील. फेब्रुवारी महिन्यात नव्या हळदीची आवक होण्यास प्रारंभ होईल. त्यामुळे नव्या आणि जुन्या हळदीचा उठावदेखील होईल. त्यामुळे जुनी हळद शिल्लक राहणार नाही. देशातील हळद उत्पादन घेणाऱ्या राज्यात गेल्या दोन महिन्यांत अतिवृष्टी झाली. या अतिवृष्टीचा फटका हळद पिकास बसला असल्याने हळदीच्या उत्पादनात १० टक्क्यांनी घट होईल, असा अंदाज व्यक्त होत आहे. जरी उत्पादन घट झाली तरी, हळदीच्या दरात फारशी तेजी-मंदी होण्याची शक्यता नाही. देशांतगर्त आणि परदेशात हळदीची मागणी वाढत असल्याने हळदीचे दर टिकून राहतील. दररोज १०० ते १५० टन हळदीची होते निर्यात युरोपसह बांगलादेश आणि आखाती परदेशात हळदीची मागणी वाढली आहे. त्यामुळे देशातून दररोज १०० ते १५० टन हळदीची निर्यात होत आहे. निर्यातीच्या हळदीला प्रति क्विंटल ७७०० ते ७९०० रुपये असा दर मिळत आहे. त्यामुळे निर्यात देखील वाढण्याची शक्यता आहे. प्रतिक्रिया देशात सद्यःस्थितीला ३७ लाख पोती शिल्लक असली, तरी गेल्या वर्षीच्या तुलनेत यंदा हळदीचे दर टिकून आहेत. हळदीची मागणी देखील वाढली आहे. निर्यातीत देखील वाढ झाली आहे. त्यामुळे हळदीच्या दरात फारशी तेजी-मंदी होण्याची चिन्हे नाहीत. मनोहर सारडा, हळद व्यापारी, सांगली
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.