नांदेड : हळदीचे कंद जमिनीत सडले

नांदेड : गोदावरी नदीच्या पुरामुळे बागायती पिकांना मोठा फटका बसला आहे. पुराचे बॅकवाटॅर (उसावा) शेतात तीन दिवसांपेक्षा अधिक काळ साचून राहिल्यामुळे हळदीचे कंद जमिनीत सडून गेले आहेत. यामुळे मुदखेड तालुक्यातील वसंतवाडी, रोहीपिंपळगाव शिवारातील शेतकऱ्यांनी हळदीचे उभे पीक कापून काढण्याचा सपाटा लावला आहे.

जिल्ह्यात सहा व सात सप्टेंबर रोजी मुसळधार पाऊस झाला. या पावसामुळे जिल्ह्यातील लहान - मोठ्या नाल्यांना पूर आला होता. या सोबतच नांदेड शहराजवळील गोदावरी नदीवर असलेल्या विष्णुपुरी प्रकल्पातही पाणीसाठा प्रचंड वेगाने वाढला. यामुळे नांदेड पाटबंधारे विभागाकडून प्रकल्पातील जलसाठा नियंत्रित करण्यासाठी प्रकल्पाचे पंधरा दरवाजे उघडून तब्बल अडीच लाख क्सुसेक वेगाने पाणी नदीत सोडले. यामुळे गोदावरी नदीला पूर आला होता. 

या दरम्यान गोदावरीला मिळणाऱ्या इतर उपनद्या तसेच नाल्याचा पूर पाठीमागे थोपला. यामुळे नदीकाठच्या हजारो एकरमधील पिकांना जलसमाधी मिळाली. यात ऊस, केळी, हळद या बागायती पिकांसह सोयाबीन, कापूस, ज्वारी, तूर अशा पिकांचे संपूर्ण नुकसान झाले. खरीप पिकांचा कोळसा झाल्यानंतर या भागातील हळदीचे कंद सडून गेले आहेत. यामुळे पीक वाळून जात असल्याने मुदखेड तालुक्यातील वसंतवाडी, रोही पिंपळगाव अशा अनेक गावातील शेतकरी मागील दोन दिवसापासून हळदीचे पीक कापून काढत आहेत. 

याबाबत वसंतवाडी येथील संभाजी महाजन शिंदे यांच्याशी संपर्क केला असता त्यांनी तीन दिवस पुराचे पाणी हळदीच साचून होते, यामुळे कंद सडले असून हळद वाळत होती. यामुळे गावातील चौघांनी हळद कापून काढली. आजपर्यंत एकरी चाळीस हजार खर्च झाला आहे. पुन्हा खर्च करून पीक सुधारले नाही तर ते परवडणार नाही, यामुळे हळद कापून काढल्याचे ते म्हणाले.