जीएसटीमुळे सूत उद्योग अडचणीत ः अण्णासाहेब डांगे

इस्लामपूर, जि. सांगली ः अठरा टक्के जीएसटी सूतगिरण्यांच्या बोकांडीवर बसल्याने सूत उद्योग अडचणीत अाले आहे. विदर्भाचा बॅकलॉग भरून काढण्यासाठी सरकार पश्‍चिम महाराष्ट्रावर अन्याय करीत आहे. सरकारच्या दुटप्पी भूमिकेमुळे सूतगिरण्या अडचणीत आल्या आहेत. पश्‍चिम महाराष्ट्रातील लोकांना व्यवसाय करू द्यायचा नाही, ही या सरकारची नीती असल्याचा आरोप दीनदयाळ सूतगिरणीचे संस्थापक माजी मंत्री अण्णासाहेब डांगे यांनी केला.

येथील दीनदयाळ मागासवर्गीय सहकारी सूतगिरणीच्या २३ व्या वार्षिक सर्वसाधारण सभेत ते बोलत होते. अध्यक्ष हणमंतराव सूर्यवंशी अध्यक्षस्थानी होते. उपाध्यक्ष प्रकाश बिरजे, एक्‍झिक्‍युटिव्ह डायरेक्‍टर ॲड. चिमण डांगे, माजी आमदार भगवानराव साळुंखे, सी. बी. पाटील, विजयभाऊ पाटील, नगराध्यक्ष निशिकांत पाटील, सुरेखाताई जाधव, संभाजी कचरे प्रमुख उपस्थित होते.

डांगे म्हणाले, ‘विदर्भ मराठवाड्यापेक्षा येथे वीजदर जास्त आहे. सुताचे भाव कापसापेक्षा कमी झाल्याने अडचणी वाढल्या. जीएसटी, सूत धंद्यात असणारी जागतिक मंदी यामुळे कापसाचा ढासळलेला दर्जा व राज्य सरकारच्या चुकीच्या धोरणामुळे राज्यातील सूतगिरण्या अडचणीत आल्या आहेत. या वेळी भगवानराव साळुंखे, सी. बी. पाटील, चिमण डांगे, दादासाहेब पाटील, संपतराव पाटील, बाबूराव हुबाले, धनपाल माळी, मुकुंद कांबळे, वैभव पवार, अविनाश खरात, सुमंत महाजन उपस्थित होते. ए. के. पाटील, बजरंग पाटील यांनी सूत्रसंचालन केले.

आदर्श कामगारांचे सत्कार आदर्श कामगार पुरस्काराचे वितरण अण्णासाहेब डांगे यांच्या हस्ते करण्यात आले. यामध्ये संतोष माने, दिलीप माळी, लालासाहेब मुजावर, रबुल हक्‍क, प्रदीपकुमार शाहू, जितेंद्र पटेल यांना सन्मानचिन्ह व रोख रक्कम देऊन गौरविण्यात आले.