नगर जिल्हा परिषदेला रस्ते  दुरुस्तीसाठी हवेत २६ कोटी

नगर  ः नुकत्याच झालेल्या पावसाने जिल्ह्यातील रस्त्यांची दुरवस्था झाली आहे. या रस्तादुरुस्तीसाठी जिल्हा परिषदेला २६ कोटींच्या निधीची आवश्‍यकता लागणार आहे. 

जिल्हा परिषदेच्या सार्वजनिक बांधकाम विभागाअंतर्गत १४ हजार १८५ किलोमीटर रस्ता आहे. यामध्ये उत्तर विभागात ६८६०, तर दक्षिण विभागात ७३२५ किलोमीटर रस्त्याचा समावेश आहे. यामध्ये इतर जिल्हा व ग्रामीण मार्गांचा समावेश आहे. ऑक्‍टोबर महिन्यात झालेल्या पावसाने जिल्ह्यातील रस्त्यांची दुरवस्था झाली आहे. या संदर्भात जिल्हा परिषदेच्या बांधकाम विभागाने ग्रामीण व इतर जिल्हा मार्गांची पाहणी करण्याच्या सूचना शाखा अभियंत्यांना दिल्या आहेत. त्यानुसार जिल्ह्यातील रस्त्यांची पाहणी सुरू असून, अहवाल तयार करण्याचे काम सुरू आहे.

ऑक्‍टोबरमधील पावसाचा सर्वाधिक फटका जिल्ह्याच्या उत्तर भागाला बसला आहे. तेथे रस्त्यांची मोठी दुरवस्था झाली आहे. या रस्त्यांची दुरुस्ती करण्यासाठी जिल्हा परिषदेच्या बांधकाम विभागाला २६ कोटी रुपयांची आवश्‍यकता भासणार आहे. यात उत्तर विभागामध्ये १९ कोटींची, तर दक्षिण विभागाला सात कोटींची गरज भासणार आहे. हा प्राथमिक अंदाज असून, यामध्ये वाढ होण्याची शक्‍यता असल्याचे दक्षिण व उत्तर सार्वजनिक बांधकाम विभागातर्फे सांगण्यात आले.