परभणी, हिंगोलीतील दूध उत्पादकांच्या थकीत देयकांसाठी दोन कोटींचा निधी 

 परभणी  ः शासकीय दूध योजनेअंतर्गत परभणी येथील दुग्धशाळेत परभणी आणि हिंगोली जिल्ह्यांतील दूध उत्पादकांकडून संकलित केलेल्या दुधाची थकित देयके अदा करण्यासाठी दोन कोटी रुपये निधी प्राप्त झाला आहे. संबंधित दूध उत्पादकांना देयके देण्यासाठी सहकारी दूध उत्पादक संस्थांच्या खात्यावर हा निधी वर्ग करण्यात आला आहे. अजून तीन कोटी रुपयांचा निधी प्राप्त होणार असल्याची माहिती दुग्धशाळेच्या सूत्रांनी दिली.

मंगळवारच्या (ता. ११) ‘अॅग्रोवन’मध्ये दूध उत्पादकांची साडेसात कोटींवर देयके थकित असल्याबाबतचे वृत प्रकाशित झाले होते. या वृत्ताची दखल घेत पशुसंवर्धन व दुग्ध व्यवसाय विकास विभागाने गुरुवारी (ता. १३) शासकीय दुग्धशाळेकडे दोन कोटी रुपयांचा निधी थकित दूध देयके अदा करण्यासाठी उपलब्ध करून दिला आहे.प्राप्त निधी परभणी आणि हिंगोली जिल्ह्यातील सहकारी उत्पादक संस्थांच्या खात्यावर जमा करण्यात आला. अजून तीन कोटी रुपये निधी उपलब्ध होणार आहे, असे जिल्हा दुग्ध व्यवसाय विकास अधिकारी सतीश डोईफोडे यांनी सांगितले.

प्राप्त झालेल्या दोन कोटी रुपये निधीतून ३० एप्रिलपर्यंतची थकित दूध देयके अदा करता येतील. तीन कोटी रुपये उपलब्ध झाल्यानंतर १५ मे पर्यंतची देयके अदा करता येतील. परंतु १५ जून पर्यंतची देयके थकित राहतील. त्यासाठी अजून २ ते ३ कोटी रुपये निधीची गरज आहे. आधीच दुष्काळी स्थिती त्यात दोन महिन्यांची देयके थकल्यामुळे दूध उत्पादकांच्या अडचणी वाढल्या होत्या. चारा, पेंड खरेदीसाठी पैसे नसल्यामुळे अनेक शेतकऱ्यांनी दुधाळ जनावरांची कमी दराने विक्री केली. त्यामुळे दूध संकलनात घट झाली. थकित देयकांसाठी निधी प्राप्त झाल्यामुळे परभणी, हिंगोली जिल्ह्यातील दूध उत्पादकांना दिलासा मिळाला. दोन्ही जिल्ह्यांतील सुमारे दीडशे दूध उत्पादक सहकारी संस्थांचे पाच महिन्यांचे कमिशन, थकित कमिशन तसेच मे आणि जून महिन्यातील थकित दूध देयके अदा करण्यासाठी निधी उपलब्ध करून देण्याची गरज आहे.