नांदेड जिल्ह्यात दोन लाख शेतकरी पीककर्जाच्या प्रतिक्षेत

नांदेड : जिल्ह्यातील बॅंका जुन्या कर्जदार शेतकऱ्यांना देखील अनावश्यक कागदपत्रांची मागणी करत आहेत. त्यामुळे पीककर्जासाठी शेतकऱ्यांना हेलपाटे मारावे लागत आहेत. अद्याप १ लाख ९७ हजार ५०६ शेतकरी कर्ज मिळण्याची वाट पहात आहेत. गेल्या आठवडाभरात ४ हजार ५२ शेतकऱ्यांना ३६ कोटी ८९ लाख रुपये एवढे पीककर्ज वाटप करण्यात आले.

अर्ध्याहून अधिक खरीप हंगाम संपला तरी पीककर्ज वाटपात गती आलेली नाही. यंदा सोमवार (ता.३) पर्यंत जिल्ह्यातील विविध बॅंकांनी ७० हजार ४९४ शेतकऱ्यांना ३९६ कोटी २९ लाख ७३ हजार रुपये (१९.५१ टक्के) पीककर्ज वाटप केले.

जिल्हा मध्यवर्ती सहकारी बॅंकेने पीककर्जवाटपाची उद्दिष्टपुर्ती केली आहे. व्यापारी आणि खाजगी बॅंकांचे कर्जवाटप ६ टक्केच्या आत, तर महाराष्ट्र ग्रामीण बॅंकेचे कर्जवाटप २० टक्केच्या आतच रेंगाळत आहे. बॅंका जुन्या कर्जधारकांना पीककर्ज मंजुरीसाठी फेरफार नक्कल, टोच नकाशा, बेबाकी प्रमाणपत्र आदी कागदपत्रे मागत आहेत.

शेतकऱ्यांना त्यासाठी तलाठी तसेच अन्य बॅंकांमध्ये चकरा माराव्या लागत आहेत. पीककर्जासाठी अनावश्यक कागदपत्राची मागणी करु नये, असे निर्देश जिल्हाधिकाऱ्यांनी देऊनही त्याकडे दुर्लक्ष केले जात आहे. 

सार्वजिनक क्षेत्रातील, सहकारी तसेच खाजगी बॅंकांना या वर्षीच्या खरीप हंगामात एकूण २ हजार ३१ कोटी ६७ लाख ७० हजार रुपये एवढे पीककर्ज वाटपाचे उद्दिष्ट देण्यात आले. त्यात जिल्हा बॅंकेला १८५ कोटी ७४ लाख ८२ हजार रुपये, व्यापारी बॅंकांना १ हजार ५५७ कोटी ६७ लाख ३८ हजार रुपये, महाराष्ट्र ग्रामीण बॅंकेला २८८ कोटी २५ लाख ५० हजार रुपये एवढ्या उद्दिष्टाचा समावेश आहे. सोमवार (ता.३) अखेर जिल्हा बॅंकेने ५५ हजार १२५ शेतकऱ्यांना २५८ कोटी २६ लाख १८ हजार रुपये म्हणजेच उद्दिष्टाच्या १३९.०४ टक्के पीक कर्जवाटप केले. 

महाराष्ट्र ग्रामीण बॅंकेने ८ हजार २०१ शेतकऱ्यांना ५४ कोटी ७२ लाख ४ हजार रुपये, व्यापारी आणि खाजगी बॅंकांनी ७ हजार १६८ शेतकऱ्यांना ८३ कोटी ३१ लाख ५१ हजार रुपये एवढे पीककर्ज वाटप केले.