जालना जिल्ह्यात शेतकऱ्यांनी लावले २ लाख कामगंध सापळे

जालना : गुलाबी बोंड अळीच्या नियंत्रणासाठी यंदा कृषी विभागासोबतच शेतकऱ्यांनीही कंबर कसली आहे. जालना जिल्ह्यात शेतकऱ्यांनी प्रोत्साहित होऊन स्वखर्चाने २ लाख कामगंध सापळे कपाशी पिकात लावले. याला २० हजार ४२१ अनुदानावरील सापळ्यांची जोड मिळाली. लिंबोळी अर्काचीही अनेक शेतकऱ्यांनी फवारणी घेतल्याची माहिती अधीक्षक कृषी अधिकारी विजय माईनकर यांनी दिली.

माईनकर म्हणाले, ‘‘यंदा जालना जिल्ह्यात २ लाख ९४ हजार हेक्‍टरवर कपाशीची लागवड झाली आहे. गुलाबी बोंड अळीच्या नियंत्रणासाठी जूनपासूनच मोहीम हाती घेतली होती. चित्ररथाद्वारे, प्रत्यक्षिकांमधून, गावोगावी बोन्ड अळी नियंत्रणासाठी उपाय योजले गेले. नुकतेच धालसखेडा व पराडा येथे जिल्हा मासिक चर्चासत्राचे आयोजन करण्यात आले होते. नियंत्रणाचा भाग म्हणून कृषी विभागामार्फत १ लाख कृषी सल्ला पत्रकांचे वाटप केले जात आहे. १५०० भित्तीपत्रके विविध गावात लावण्यात आली आहेत. जिल्ह्यातील कडेगाव, केदारखेड, हरपाळा, वाढोना, लावणी, बनटाकळी, ढाकेफळ या आठ गावात ट्रायकोकार्डचे प्रात्यक्षिक घेण्यात आले. त्यामधून गुलाबी बोंड अळीच्या नियंत्रणासाठी मदत झाली.

 ज्या गावामध्ये अळीचा प्रादुर्भाव नुकसान पातळीच्या वर दिसला, त्या गावशिवरातील कपाशी पिकावर प्रोफेनोफास २० ईसी (२० एमएल) प्रति १० लिटर पाण्यामध्ये मिसळून फवारावे. दुसरी फवारणी थायोडिकारब २० ग्राम प्रति १० लिटर पाण्यामध्ये (साध्या पंपासाठी) मिसळून फवारणी करण्याचा सल्ला कृषी विभागाने दिला आहे.