खेडमध्ये दोन रेशन दुकानदारांचे परवाने रद्द

पुणे  ः नागरिकांनी केलेल्या तक्रारीनंतर रेशन दुकानाची पाहणी करण्यात येत आहे. खेड तालुक्यातील रेशन दुकानदारांकडून रेशनकार्ड धारकांना धान्य कमी वाटप करणे, त्याची नोंद न ठेवणे, कार्ड धारकांशी उद्धटपणे वागणूक देणे अशा कार्डधारकांच्या व स्थानिक नागरिकांच्या तक्रारी व प्रत्यक्ष स्थळपाहणी खेड तहसीलदारांनी केली. त्यानंतर निदर्शनास आलेल्या दोन स्वस्त धान्य दुकानदारांचा परवाना तात्पुरता रद्द करण्यात आला असल्याची माहिती खेड तहसीलदार कार्यालयाच्या सूत्रांनी दिली.  

तालुक्यातील पांगरी येथील संभाजी बाजीराव तळेकर, वडगाव घेनंद येथील संपत बाबुराव बवले यांच्या सरकारमान्य स्वस्त धान्य दुकानात रेशन धारकांना शासनाने दिलेल्या साठ्यापेक्षा कमी धान्य देण्यात येत होते. आलेल्या धान्याची नोंद ठेवली जात नव्हती. भाव फलकावर भाव लिहिले जात नव्हते, स्टॉक पत्रक भरले जात नव्हते आणि आलेल्या रेशनकार्ड धारकांशी उद्धट बोलले जात असल्याच्या अनेक तक्रारी तालुका पुरवठा विभाग व तहसीलदार यांच्याकडे आल्या होत्या. 

त्यानुसार मंडलाधिकारी, पुरवठा अधिकारी, तलाठी आणि तहसीलदार यांनी या ठिकाणी भेटी देऊन संबंधित दुकानदारांची कानउघाडणी केली होती. मात्र, त्यात बदल होत नसल्याने या दोन दुकानदारांचा तात्पुरता परवाना रद्द करण्यात आला आहे. पुढील कारवाईचा प्रस्ताव जिल्हा पुरवठा अधिकाऱ्यांकडे पाठविण्यात आला असून त्यानंतर या दुकानावर मोठी कारवाई केली जाणार आहे.

पांगरी येथील संभाजी बाजीराव तळेकर यांचा परवाना तात्पुरता रद्द करून बुट्टेवाडी येथील आशा प्रभाकर पोळ यांच्या स्वस्त धान्य दुकानात पुढील आदेश येईपर्यंत धान्य वाटप होणार आहे. वडगाव घेनंद येथील संपत बाबुराव बवले यांचा परवाना तात्पुरता रद्द करण्यात आला असून पुढील आदेश येईपर्यंत भोसे येथील अरूण हलगे यांच्या दुकानातून धान्य वाटप केले जाणार आहे, अशी माहिती तहसीलदार सुचित्रा आमले यांनी दिली.