पुणे जिल्ह्यात दोन हजार ३५४ पीककापणी प्रयोग

पुणे ः पिकांची उत्पादकता आणि पीकविमा नुकसानभरपाई निश्चित करण्यासाठी पीक कापणी प्रयोग घेण्यात येणार आहे. चालू वर्षी खरीप हंगामात पीकविमा योजनेअंतर्गत मंडळनिहाय गटांमध्ये प्रत्येक पिकांसाठी किमान बारा प्रयोग घेणे अनिवार्य आहे. पुणे जिल्ह्यात एकूण दोन हजार ३५४ एवढे पीक कापणी प्रयोग घेण्यात येणार असल्याची माहिती कृषी विभागाच्या सूत्रांनी दिली. 

खरीप हंगाम २०१९-२० अंतर्गत पुणे जिल्ह्यात पीक कापणी प्रयोग हे पीकविमा नुकसानभरपाई निश्चित करण्यासाठी महत्त्वाचे आहे. त्यामुळे पीक कापणी प्रयोग अत्यंत काळजीपूर्वक करणे आवश्यक आहे. पीक कापणीचे प्रयोग विहित कालमर्यादेत पूर्ण करून त्याची माहिती पंतप्रधान पीकविमा योजनेअंतर्गत केंद्र शासनास सादर केली जाते. पीक कापणी प्रयोग महसूल ग्रामविकास व कृषी या तिन्ही यंत्रणांमार्फत करण्यात येते. पिकांची उत्पन्नाची आकडेवारी कृषी विभागाला अचूक व वेळेवर उपलब्ध होण्यासाठी पीक कापणी प्रयोगाचे नियोजन, अंमलबजावणी आणि पर्यवेक्षणासाठी प्रत्येक तालुक्यात समिती स्थापन करण्यात आली आहे. 

समितीमध्ये तहसीलदार, गटविकास अधिकारी, तालुका कृषी अधिकारी, तालुका विकास अधिकारी ग्रामीण बॅंकेचे तालुक्याचे बॅंक प्रतिनिधी, विमा प्रतिनिधी आहेत. तसेच, ग्रामस्तरावर समिती स्थापन करण्यात येते. त्यामध्ये तलाठी, ग्रामसेवक, कृषी सहायक, पोलिस पाटील, सरपंच, उपसरपंच, विमा प्रतिनिधी, शेतकरी प्रतिनिधी सदस्य आहेत. पीक कापणीच्या वेळी ग्रामस्तरीय समितीमधील सदस्य उपस्थित राहणे आवश्यक आहे. पीक कापणी प्रयोगासाठी मोबाईल अॅप बंधनकारक आहे.

तालुकानिहाय संख्या  हवेली १६८, मुळशी ११६, भोर २१६, मावळ १३८, वेल्हे ११४, जुन्नर १३२, खेड ३००, आंबेगाव १७६, शिरूर २८८, बारामती १९०, इंदापूर १८२, दौंड १५५, पुरंदर १७९.