नगर जिल्हा बँकेच्या अध्यक्षपदी उदय शेळके

नगर : नगर जिल्हा मध्यवर्ती सहकारी बँकेच्या अध्यक्षपदी राष्ट्रवादी काँग्रेसचे उदय गुलाबराव शेळके (पारनेर) यांची तर उपाध्यक्षपदी बाळासाहेब थोरात यांचे समर्थक माधवराव कानवडे (संगमनेर) यांची बिनविरोध निवड झाली आहे. शनिवारी (ता.६) दुपारी झालेल्या संचालक मंडळाच्या सभेत या निवडी बिनविरोध करण्यात आल्या. 

बॅंकेच्या निवडणुकीत काँग्रेस, राष्ट्रवादी काँग्रेस, शिवसेनेच्या महाविकास आघाडीने सर्वाधिक जागा घेत आपले वर्चस्व कायम ठेवले. संचालक मंडळाच्या १७ जागा बिनविरोध झाल्या. तर चार जागांसाठी निवडणूक झाली. चार पैकी दोन जागा भाजपला व दोन जागा महाविकास आघाडीला मिळाल्या होत्या. इतर जागा बिनविरोध झाल्या तरी शेळके यांना निवडणुकीला सामोरे जावे लागले होते. मात्र त्यात त्यांनी मोठ्या फरकाने विजय मिळवला होता. जिल्हा जिल्हा उपनिबंधक तथा निवडणूक निर्णय अधिकारी दिग्विजय आहेर यांच्या अध्यक्षतेखाली संचालक मंडळाची सभा झाली.

या सभेत अध्यक्षपदासाठी उदय गुलाबराव शेळके यांचा तर माधवराव कानडे यांचा एकमेव अर्ज आल्याने दोन्ही निवडी बिनविरोध झाल्या. निवडीआधी आधी अध्यक्ष, उपाध्यक्षपदाची नावे निश्चित करण्यासाठी महसूल मंत्री बाळासाहेब थोरात, जलसंधारण मंत्री शंकरराव गडाख, राज्यमंत्री प्राजक्त तनपुरे यांनी बैठक झाली.

बैठकीत ठरलेल्या नावांना वरिष्ठ पातळीवरून होकार आल्यावर नावे जाहीर करण्यात आली. पारनेरमधील उदय शेळके मुंबईतील जीए महानगर बँकेचे अध्यक्ष आहेत. संगमनेरचे माधवराव कानवडे ज्येष्ठ नेते असून, महसूल मंत्री बाळासाहेब थोरात यांचे समर्थक आहेत.