मकाप्रक्रिया प्रकल्प, कॉटनहबसाठी प्रयत्न करू : उध्दव ठाकरे

सिल्लोड, जि. औरंगाबाद : विधानसभा निवडणुकीनंतर युतीचे सरकार सत्तेवर आल्यास गावागावांत उद्योगधंदे व बेरोजगारांच्या हाताला काम उपलब्ध करून देणार आहे. यासोबतच सिल्लोड-सोयगाव मतदारसंघात मकाप्रक्रिया प्रकल्प, कॉटनहब तयार करण्यासाठी विशेष प्रयत्न केले जातील, असे प्रतिपादन शिवसेना पक्षप्रमुख उद्धव ठाकरे यांनी केले. सिल्लोड-सोयगाव मतदारसंघातील महायुतीचे उमेदवार अब्दुल सत्तार यांच्या प्रचारार्थ सिल्लोड येथे रविवारी (ता. १३) जिल्हा परिषदेच्या मैदानावर आयोजित सभेत ते बोलत होते. याप्रसंगी व्यासपीठावर माजी खासदार चंद्रकांत खैरे, आमदार अंबादास दानवे, जिल्हा परिषदेच्या अध्यक्षा देवयानी डोणगावकर, शिवसेना जिल्हाप्रमुख नरेंद्र त्रिवेदी, उमेदवार अब्दुल सत्तार, भाजपचे प्रदेश कार्यकारिणी सदस्य डॉ. मच्छिंद्र पाखरे, जिल्हा उपाध्यक्ष राजेंद्र ठोंबरे यांच्यासह शिवसेना पदाधिकाऱ्यांची उपस्थिती होती. श्री. ठाकरे म्हणाले, की शिवसेना परंपरा घेऊन चालणारा पक्ष आहे. युती झाल्यानंतर शिवसेनेला जागा सुटल्यामुळे शिवसेना ही जागा लढते आहे. ही निवडणूक जनतेच्या हातात असून, शिवसेनेचा वाघ एकटा लढून जिंकतो, काळजी करू नका, लढायचे व जिंकायचे. ठाकरे घराण्याची परंपरा खरे बोलण्याची आहे. त्यामुळे जे बोलेन ते करेन. सत्तारभाई विचाराने सोबत आहेत. त्यामुळे सत्तार आपल्या सोबत असून उद्या सत्तारांसोबत आपली सत्ताही येणार आहे. युती केली आहे केलीच ना पुढील काळात सर्वसामाण्यांना आरोग्याची सुविधा उपलब्ध करून देण्यासाठी एक रुपयामध्ये प्राथमिक तपासणी चाचणी सेवा गोरगरिबांसाठी उपलब्ध करून देणार आहे. गोरगरीब जनतेच्या आरोग्याची काळजी यानिमित्ताने घेतली जाणार आहे. शेतकऱ्यांच्या पाठीशी शिवसेना खंबीरपणे उभी राहिली आहे. गतकाळात दीड कोटी शेतकऱ्यांपैकी ९० लाख शेतकऱ्यांना पीकविमा देण्यापासून अपात्र ठेवण्यात आले होते. २ हजार कोटी रुपयांवर पीकविमा कंपन्यांनी डल्ला मारला होता. शिवसेनेने याविषयी लक्ष घालून मोर्चे काढून पीकविमा कंपन्यांना ताळ्यावर आणले. यामुळे शेतकऱ्यांना ११०० कोटी रुपयांचा पीकविमा मिळाल्याचा उल्लेख श्री. ठाकरे यांनी केला.