सरकारने कर्जमाफीत घोटाळा केला : उध्दव ठाकरे

नगर  ः राज्यातील शेतकऱ्यांसाठी कर्जमाफी घोषणा केली; मात्र शेतकऱ्यांना एक छदामही मिळाला नाही. ‘तुम्हाला कर्जमाफी मिळाली का?’ असे उपस्थितांना विचारत सरकारने कर्जमाफीत घोटाळा केल्याचा आरोप शिवसेना पक्षप्रमुख उद्धव ठाकरे यांनी केला. प्रत्येकास घर, खात्यावर पंधरा लाख, अच्छे दिन हा सारा जुमला असल्याची टीकाही ठाकरे यांनी केली.

नगर येथे रविवारी (ता. २१) शिवसेनेतर्फे महामेळाव्याचे आयोजन करण्यात आले. या वेळी महापालिकेची भुयारी गटार योजना व अमृत पाणी योजनेचा प्रारंभ श्री. ठाकरे यांच्या हस्ते करण्यात आला. पर्यावरणमंत्री रामदास कदम, आमदार विजय औटी, नीलम गोऱ्हे, महापौर सुरेखा कदम, माजी आमदार अनिल राठोड, संपर्कप्रमुख भाऊ कोरेगावकर या वेळी उपस्थित होते.

श्री. ठाकरे म्हणाले, की नगरसह राज्यातील अनेक भागांत दुष्काळ आहे, सरकारला मात्र पाहायला वेळ नाही. इतरांकडे जातीपातीच्या भिंती आहेत, पण छप्पर नाही. आम्ही भिंती नसल्या तरी चालेल, छप्पर देतो. हिंदुत्वाच्या मुद्द्यावर अनेक वर्षे भाजप- शिवसेनेची युती आहे. मात्र भाजपला राममंदिराचा विसर पडला आहे. राज्यात महिला, मुले, नागरिक असुरक्षित आहेत. चांगेल काम करणाऱ्याला शिक्षा दिली जातेय. नगर जिल्ह्यामध्ये भाजप, राष्ट्रवादी व काँग्रेस यांची मिलीभगत असून ते सामाईकपणे गुंडगिरी करत आहेत, ती मोडून काढणार आहे. सरकार येण्याचा भाजपच्या लोकांना विश्‍वास नव्हता, असे त्यांचेच लोक सांगत असले, तरी अशाच लोकांचे सरकार येतेय. राज्यात दुष्काळ आहे, पाणी नाही, लोक पाण्यासाठी आजच भटकंती करत आहेत आणि सरकार मात्र घरपोच दारू देण्याचा विचार करतेय, असे सांगत सरकार आणि भाजपवर श्री. ठाकरे यांनी टीका केली.

‘आम्ही पोलखोल करू’ उद्धव ठाकरे म्हणाले, की आम्ही सरकारविरोधी बोलत असल्याचे काही लोकांचे म्हणणे आहे; आम्ही सरकारविरोधी नाही, तर जनतेच्या बाजूने बोलतोय. विरोधात आहोत असे म्हणणारे गप्प आहेत. सरकार घोषणांचा पाऊस पाडतेय, प्रत्यक्षात काहीच मिळत नाही. शिवसैनिक आता प्रत्येक लाभार्थ्याकडे जाऊन योजनांची पोलखोल करणार आहे.