उजनी शंभर टक्के भरले; तरीही यंदा महिनाभर उशीर

सोलापूर : गेल्या काही दिवसांपासून सोलापूरवासीयांच्या नजरा लागून राहिलेल्या आणि जिल्ह्याची वरदायिनी असलेल्या उजनी धरणाची पाणीपातळी मंगळवारी (ता. ५) रात्री अकरा वाजता अखेर शंभर टक्क्यांपर्यंत पोहोचली. दमदार पावसाअभावी यंदा तब्बल महिनाभर उशिराने धरण शंभर टक्क्यांपर्यंत पोहोचले. या पाण्याचा सोलापूरसह पुणे आणि नगर जिल्ह्यांतील शेतीसह सुमारे सव्वाशेहून अधिक गावच्या पाणीपुरवठा योजनांना फायदा होतो.  उजनी धरणाच्या वरच्या बाजूला असलेल्या पुणे जिल्ह्यातील धरणाकडून येणाऱ्या पाण्याच्या विसर्गावर धरणाने शंभर टक्क्यांची पातळी गाठली. गेल्या पंधरवड्यापासून धरणाकडे येणाऱ्या पाण्याचा विसर्ग कमी-जास्त होत होता. पण त्यात सातत्य होते. याच सातत्यामुळे पाणीपातळीत वाढ होत गेली. मंगळवारी (ता. ५) रात्री १० च्या सुमारासही दौंडकडून धरणात सात हजार ६९३ क्युसेस विसर्ग उजनी धरणात मिसळत होता. गतवर्षीच्या तुलनेत उजनी यंदा एक महिना ५ दिवस उशिराने भरले. दरवर्षी साधारण ऑगस्ट महिन्यात धरण भरते. यंदा मात्र जुलैपर्यंत धरण ५० टक्क्यांपर्यंतच होते. पण पुढे उर्वरित ५० टक्के धरण भरण्यासाठी भरण्यासाठी दोन महिन्यांचा कालावधीला लागला. सोलापूरसह पुणे जिल्ह्यातील इंदापूर, नगर जिल्ह्यातील कर्जत या भागातील शेतीसह सुमारे सव्वाशेहून अधिक पिण्याच्या पाणी योजना या पाण्यावर अवलंबून असतात. धरण आता शंभर टक्के भरल्याने या भागातील पाण्याची चिंता मिटली आहे.    पाणीसाठा १००.६७ टक्क्यांवर मंगळवारी रात्री उशिराने पाणीसाठ्याने शंभरीपर्यंत टक्केवारी गाठली. त्यानंतर बुधवारी (ता. ६) धरणात एकूण पाणीसाठा ११७.५९ टीएमसी झाला असून, त्यापैकी उपयुक्त साठा ५३.९३ टीएमसी, तर पाण्याची टक्केवारी १००.६७ टक्क्यांपर्यंत पोहोचली.