नागपूर : जिनर्स आणि सीसीआयमध्ये तोडगा निघत नसल्याच्या परिणामी राज्यात शासकीय कापूस खरेदी लांबणीवर पडण्याची शक्‍यता वर्तविली जात आहे. कापूस पणन महासंघ हा सीसीआयचा एजंट म्हणून कापसाची खरेदी करतो, परंतु या वर्षी सीसीआयच्या खरेदीबाबत अनिश्चितता असल्याने पणन महासंघाची स्थिती अडकित्त्यात फसल्यासारखी झाली आहे.
राज्यात दिवाळीपूर्वी महाराष्ट्र राज्य कापूस पणन महासंघाची खरेदी सुरू होते. त्याकरिता केंद्रदेखील जाहीर केली जातात. शेतकऱ्यांना दिवाळी सण साजरा करण्यासाठी लागणाऱ्या पैशाची सोय व्हावी, यासाठी प्रशासन स्तरावर ही काळजी घेतली जाते. या वर्षी मात्र कापूस खरेदीच्या मुद्यावर जिनर्स आणि सीसीआय यांच्यात काही मुद्यांवर एकमत होत नसल्याने खरेदी केंद्रांविषयी अनिश्चितता आहे. यंदा सीसीआयकडूनच खरेदीबाबत हालचाली नसल्याने कापूस पणन महासंघाच्या खरेदीचे घोडे अडले आहे.
शासकीय खरेदी सुुरू झाल्यास बाजारात कापूस दर तेजीत येतील, असा अंदाज जाणकार व्यक्‍त करतात. सद्या ५५०० ते ६००० रुपयांपर्यंतचा दर कापसाला आहे. त्यात आणखी वाढ होईल, अशी स्थिती आहे. मात्र गरजेपोटी शेतकऱ्यांकडून कापूस विक्रीची घाई होत आहे. त्याचा फायदा व्यापाऱ्यांना होत असल्याचे सूत्रांनी सांगितले.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.