शास्वत उत्पन्नासाठी रेशीम उद्योग समजून घ्या : हाके

औरंगाबाद : शाश्वत उत्पादन व उत्पन्नासाठी नव्याने रेशीम उद्योगाकडे वळलेल्या शेतकऱ्यांनी रेशीम उद्योग समजून घेण्याची गरज आहे, असे विभागीय रेशीम सहाय्यक संचालक दिलीप हाके यांनी सांगितले. गंगापूर तालुक्‍यातील भालगाव नारवाडी तसेच वैजापूर तालुक्‍यातील शिवूर व पोखरी येथे नुकत्याच आयोजित केलेल्या शेतकरी प्रशिक्षण शिबिरात ते बोलत होते.

औरंगाबाद जिल्हा रेशीम कार्यालयातर्फे ‘रेशीम शेती कशी करावी’ यासाठी या प्रशिक्षणाचे विविध ठिकाणी आयोजन करण्यात येत आहे. जिल्हा रेशीम विकास अधिकारी बी. के. सातदिवे, वरिष्ठ तांत्रिक अधिकारी रा. सु. माने, क्षेत्र सहायक कीर्ती नागरगोजे, क्षेत्रीय अधिकारी चेतन कोल्हे, विठ्ठलराव काजगुंडे, विजयकुमार गायकवाड, मेरवान राठोड आदी या वेळी उपस्थित होते.

हाके म्हणाले, ‘‘केवळ अनुदानासाठी रेशीम उद्योग करता येत नाही. त्यासाठी रेशीमचे अनुदान मिळण्याचे स्वरूप निर्धारित करण्यात आले आहे. तुतीची योग्य पद्धतीने लागवड, शेवटपर्यंत बागेची जोपासना करणाऱ्या शेतकऱ्यालाच अनुदानचा लाभ मिळतो. उत्तम शेड, अंगमेहनत, तंत्रज्ञान, दर्जेदार तुतीपाला आणि प्रशिक्षण या बाबी रेशीम शेतीसाठी महत्वाच्या आहेत. त्यामुळे शेतकऱ्यांनी शास्त्रोक्‍त पद्धतीने रेशीम उद्योग करून आपला आर्थिक विकास साधावा.’’

दरम्यान, शेतकऱ्यांना तुतीची लागवड पद्धत, येणारा खर्च, रोग व किडींचा होणारा प्रादुर्भाव, तुती बागेतील झाडांची संख्या, रेशीम कीटक संगोपन, पाण्याची गरज आदींची माहिती देण्यात आली.