राज्यात अवकाळी पावसाने नुकसान

पुणे : उन्हाचा चटका वाढून, उकाडा असह्य होत असताना सोमवारी (ता. २५) दुपारनंतर नगर, सोलापूर, कोल्हापूर, सांगली, नांदेड जिल्ह्यांच्या काही भागांत वादळी वारे, गारपिटीसह अवकाळी पावसाने हजेरी लावली. अचानक आलेल्या पावसाने गहू, हरभरा, हळद, टोमॅटोसह अन्य भाजीपाला, आंबा, संत्री, डाळिंब, चिकू, द्राक्ष, केळी आदी फळपिकांना फटका बसला आहे.  नगर जिल्ह्यातील नगर आणि कर्जत तालुक्यांत वादळी वाऱ्यासह झालेल्या पावसाने पिके व फळांचे मोठे नुकसान झाले. शेतकऱ्यांनी दुष्काळात टॅंकरने पाणी आणून जगवलेल्या आंबा, संत्री, डाळिंब, चिकू आदी फळबागांमध्ये वाऱ्यामुळे फळगळ झाली.  

सोलापूर जिल्ह्यात उन्हाचा तडाखा वाढला असतानाच, सोमवारी सायंकाळी उत्तर सोलापूर, मोहोळ, बार्शी, सांगोला भागांत अवकाळी पावसाने हजेरी लावली. या पावसामुळे द्राक्ष, डाळिंब व आंबा उत्पादक शेतकऱ्यांची चिंता वाढवली. हनुमंतगाव (ता. सांगोला) येथील शेतकरी उत्तम दत्तू खांडेकर यांच्या झाडाखाली बांधलेल्या दोन बैलांचा अंगावर वीज कोसळल्याने मृत्यू झाला. अनगर (ता. मोहोळ) परिसरातील खंडोबाचीवाडी भागात तुफानी गारांचा पाऊस झाला.

नांदेड जिल्ह्यातील अर्धापूर तालुक्यात मध्यरात्री वादळी वाऱ्यासह अवकाळी पाऊस झाला. काही ठिकाणी गारांचा पाऊस झाला. केळी बागांसह काढणीस आलेली ज्वारी, गहू, हरभरा, हळद आदी पिके, आंबा तसेच भाजीपाला पिकांचे मोठे नुकसान झाले. वेगावान वाऱ्यामुळे केळी पिकाचे मोठे नुकसान झाले आहे. मळणी करून, शेतात वाळवत ठेवलेले गहू, हरभऱ्यासह, हळद, टोमॅटो व अन्य भाजीपाला पिकांना फटका बसला. अचानक वाढलेल्या उकाड्याने हैराण झालेल्या कोल्हापूर, सांगलीत गारांसह पावसासह जोरदार सरी कोसळल्या.