पुढील हंगामापर्यंत इथेनॉल प्रकल्प सुरू होणार : शेटे

चिंचखेड, ता. दिंडोरी : ‘‘‘कादवा’ला लेखापरीक्षनात ऑडिट वर्ग ''अ'' मिळाला आहे. केवळ साखर निर्मिती करून साखर कारखाने चालणे शक्य नाही. त्यामुळे केंद्र सरकारने इथेनॉल प्रकल्पास चालना दिली आहे. ‘कादवा’नेही इथेनॉल प्रकल्पाची तयारी केली आहे. पुढील हंगामापर्यंत प्रकल्प सुरू करण्याचा प्रयत्न राहील,’’ असे प्रतिपादन ‘कादवा’चे अध्यक्ष श्रीराम शेटे यांनी केले.

कादवा सहकारी साखर कारखान्याची ५९ वी वार्षिक सर्वसाधारण सभा ऑनलाइन पद्धतीने झाली. सभेसाठी सभासदांनी मोठ्या प्रमाणात ऑनलाइन नोंदणी करत झूम मिटिंगद्वारे, युट्युब लाईव्हद्वारे सभेस उपस्थित राहत प्रश्न विचारत सूचना मांडल्या. यावेळी प्रभारी विधानसभा अध्यक्ष नरहरी झिरवाळ, जिल्हा बँक संचालक गणपतराव पाटील, सचिन बर्डे, प्रकाश शिंदे, विजय वाघ, प्रा. विनायक काळे, शिवाजी शिंदे यांनी चर्चेत भाग घेत प्रश्न विचारले.

सचिन बर्डे म्हणाले, ‘‘इथेनॉल प्रकल्पाला विरोध नाही. परंतु, ऊस उत्पादकांना विश्वासात घेऊन प्रकल्प व्हावा. प्रस्तावित इथेनॉल प्रकल्पासाठी ऊस बिलातून कपात करू नये. सर्व सभासदांकडून ऐच्छिक ठेव घ्यावी, ऊस तोड वाढवावी.’’ 

प्रकाश शिंदे म्हणाले, ‘‘सर्व सभासदांकडून ठेवी घ्याव्या. बिगर ऊस उत्पादक सभासदांना ऊस लागवडीसाठी प्रोत्साहित करावे. ऊस उत्पादकांना सभासद करावे.’’ प्रा. विनायक काळे यांनी काळाची पाऊले ओळखत ‘कादवा’ने विस्तारीकरण करत इथेनॉल प्रकल्प हाती घेतल्याबाबत अभिनंदन करत सर्वतोपरी सहकार्य करावे.’’  

बाजार समितीचे सभापती दत्तात्रेय पाटील, उपसभापती अनिल देशमुख, जि.प सदस्य भास्कर भगरे, राज्य बँकेचे अधिकारी देविदास गायकवाड, संजय पडोळ, राजेंद्र ढगे आदींनी भाग घेतला.