अमरावती जिल्ह्यात सव्वालाख शेतकऱ्यांची यादी अपलोड

अमरावती : पंतप्रधान किसान सन्मान योजनेतील दोन हजार रुपयांचा पहिला हप्ता महिनाअखेरीस खात्यात जमा करण्याच्या हालचाली सुरू आहेत. त्यानुसार तीन लाख २ हजार ९३० शेतकऱ्यांची यादी तयार करण्यात आली. यातील पात्र शेतकऱ्यांनाच योजनेचा लाभ मिळणार असल्याची माहिती आहे. 

केंद्रीय अर्थसंकल्पात शेतकऱ्यांना वार्षीक सहा हजार रुपयांची मदत देण्याची घोषणा करण्यात आली. प्रत्येकी दोन हजार रुपये याप्रमाणे तीन टप्प्यांत ही मदत दिली जाणार आहे. लोकसभेच्या आचारसंहितेपूर्वी यातील पहिल्या टप्प्याचे वितरण होईल. त्या पार्श्‍वभूमीवर संबंधित यंत्रणांना या संदर्भातील प्रक्रिया पूर्ण करण्याचे निर्देश देण्यात आले. यंत्रणा देखील कंबर कसून कामाला लागल्याचे चित्र आहे. त्यासाठी ५ ते २६ फेब्रुवारी दरम्यानचा कालबद्ध कार्यक्रम जाहीर करण्यात आला. यानुसार गावनिहाय खातेदारांची संगणकीकृत यादी राष्ट्रीय अभिलेख आधुनिकीकरण कार्यक्रमाअंतर्गंत विकसित ई-फेरफार प्रणालीतून तयार करण्यात आली. यामध्ये वनहक्‍क कायद्याअंतर्गंत जिल्हा समितीने पात्र केलेल्या शेतकरी कुटुंबांचा समावेश करण्यात आला. 

जिल्हा स्तरावर दोन हेक्‍टरच्या आतील पाच एकरापर्यंत शेती असणारे तीन लाख २ हजार ९३० शेतकरी आहेत. यापैकी योजनेच्या निकषानुसार अपात्र खातेदार वगळून सद्यःस्थितीत सव्वा लाख शेतकऱ्यांची यादी पोर्टलवर अपलोड करण्यात आली. लवकरच योजनेसाठी   पात्र सर्वच लाभार्थ्यांची यादी अपलोड केली जाईल, अशी माहिती प्रशासनातील सूत्रांनी दिली. संपूर्ण यादी अपलोड झाल्यानंतरच लाभार्थ्यांचा आकडा निश्‍चित होणार आहे. जिल्ह्यातील पाच एकरातील शेतकऱ्यांना १८१.७५ कोटी मिळण्याची शक्‍यता आहे.