युरिया ब्रिकेटची पन्हाळा तालुक्यात शंभर एकरांवर प्रात्यक्षिके

कोल्हापूर : कृषी तंत्रज्ञान व्यवस्थापन यंत्रणा आत्माच्या माध्यमातून पन्हाळा तालुक्यात भात आणि नाचणीचे उत्पादन वाढण्याच्या उद्देशाने या पिकांमधे युरिया ब्रिकेट्सच्या वापराची शंभर एकर क्षेत्रावर प्रात्यक्षिके राबविण्यात आली आहेत. 

तालुक्यातील हरपवडे, गोठे, बाजारभोगाव, काऊरवाडी, किसरुळ, पाटपन्हाळा, पोहाळे तर्फ बोरगाव, पोहाळवाडी, मोताईवाडी, काळजवडे, वाळोली, वेतवडे या गावांमधील एकशे बारा शेतकऱ्यांच्या शेतावर खरिपात भात आणि नाचणी पिकासाठी प्रती एकर सत्तर किलो युरिया ब्रिकेट्स या खताचे वाटप करण्यात आले. शेतकऱ्यांना ब्रिकेट्सच्या वापराबाबत प्रशिक्षणेही देण्यात आली. 

प्रात्यक्षिके राबविण्यासाठी कृषी विज्ञान केंद्र तळसंदे कडुन आत्माने अनुदानावर युरिया ब्रिकेट्सचा पुरवठा केला होता. युरिया आणि डाय अमोनिअम फॉस्पेटच्या चॉकलेटच्या आकाराच्या गोळ्या पिकाच्या चुडात खोचल्याने खताचा -हास होत नाही आणि पिकाच्या गरजेनुसार खत उपलब्ध झाल्याने वाढीस चालना मिळते. या प्रात्यक्षिकांमुळे भागातील भात आणि नाचणीचे उत्पादन वाढण्यास मदत मिळणार आहे.