अमळनेरमध्ये रासायनिक खतांचा वापर वाढला

वावडे, जि. जळगाव  : अमळनेर तालुक्यात जवळपास ६७ हजार ५४ हेक्टर क्षेत्रावर पेरणी झाली आहे. पेरणी मागील पाच वर्षे स्थिर आहे. परंतु, युरियासह इतर खतांचा वापर दरवर्षी वाढत आहे. त्यामुळे उत्पादन खर्चात वाढ झाल्याची स्थिती आहे.

मजुरी, खतांवरचा खर्च वाढत असतानाच शेतमालास दर नाहीत. यंदा कोरोनाचे सावट आहे. शेती नुकसानीत जाईल की कापसाला चांगले दर मिळतील, अशी चर्चा गावात पारावर, शेतकऱ्यांमध्ये रंगत आहे.

रासायनिक खतांच्या अतिवापराने जमिनीचा पोत बिघडत आहे. कृषी तज्ज्ञांच्या शिफारशीनुसार मूग, उडीद, तूर व सोयाबीन पिकांच्या मुळांवर गाठी असतात. या गाठीद्वारे पिके हवेतील नत्र शोषून घेतात. त्यामुळे त्यांना नत्र खते देण्याची आवश्यकता भासत नाही. कपाशीला आवश्यकतेप्रमाणे युरिया देणे गरजेचे असते. त्यामुळे पिके जोमदार होतात व उत्पादन वाढते, असा शेतकऱ्यांचा समज आहे. त्यामुळे तालुक्यात कपाशीसह सोयाबीन, तूर, मूग, उडीद या पिकांना अनावश्यक युरिया खत दिले जात असल्याचे कृषी तज्ज्ञांचे मत आहे.

यंदा युरियाची टंचाई मोठी होती. खत विक्रेत्यांकडे रांगा लागत होत्या. शेतकरी त्रस्त झाले. परंतु, युरियाचा वापर वाढला. कृषी विभागाच्या माहितीनुसार, तालुक्यात दरवर्षी सप्टेंबर अखेरपर्यंत जवळपास २१ हजार टन खतांचा वापर झाला आहे. या वर्षी सुरवातीलाच २० हजार मेट्रिक टन खतांचा पुरवठा झाला असून, शेतकरी युरियाची मागणी करीत आहेत. युरियासह इतर खतांचा वापर वाढला आहे. मागणी अधिक असली तरी खतांचा मुबलक साठा उपलब्ध असल्याचे कृषी विभागाकडून सांगण्यात आले.

अमळनेर तालक्यात रासायनिक खतांचा वारेमाप वापर होत आहे. दिवसेंदिवस उत्पादकता व जमिनीचा पोत खराब होत आहे. याबाबत कृषी विभागाने जनजागृती करणे गरजेचे आहे. मात्र, याबाबत कुठलेही मार्गदर्शन अथवा सल्ला मिळत नसल्याने दिवसेंदिवस खतांचा वापर वाढत आहे, असेही काही शेतकऱ्यांचे म्हणणे आहे.