मालेगाव तालुक्यात मास्कचा वापर अनिवार्य 

मालेगाव, जि. नाशिक : ‘कोरोना’ विषाणूचा संसर्ग देशात व राज्यात गतीने होत आहे. राज्य शासनाने हा प्रसार रोखण्यासाठी राज्यात साथीचा रोग प्रतिबंधक कायदा लागू केला आहे. परस्पर संपर्कामुळे या विषाणूचा संसर्ग व प्रसार होण्याची शक्यता लक्षात घेऊन मानवी जीविताला, आरोग्याला किंवा सुरक्षिततेला संकट निर्माण होऊ शकते. ‘कोरोना’ विषाणूचा संसर्ग रोखण्यासाठी साथरोग प्रतिबंधात्मक कायदा १८९७ आणि आपत्ती व्यवस्थापन कायदा २००५ या कायद्यातील तरतुदीच्या अंमलबजावणीसाठी मालेगाव तालुक्यातील नागरिकांना मास्कचा वापर अनिवार्य राहील, असे उपविभागीय दंडाधिकारी विजयानंद शर्मा यांनी कळविले आहे. 

मालेगाव शहर व तालुक्यातील सर्व संबंधित नागरिकांना मास्कचा वापर अनिवार्य राहणार असून मानांकित प्रतीचे अथवा घरगुती पद्धतीने तयार केलेले व योग्य पद्धतीने स्वच्छ व निर्जंतुक करून पुन्हा वापरता येण्याजोगे अथवा स्वच्छ रुमालाने तोंड बांधणे आवश्यक राहील. 

सदर आदेशाचे उल्लंघन केल्यास संबंधिताविरुद्ध साथरोग प्रतिबंधक अधिनियम १८९७, आपत्ती व्यवस्थापन कायदा २००५ व भारतीय दंड संहिता १८६०चे कलम १८८ नुसार कारवाई करण्यात येईल व संबंधित व्यक्तीकडून रुपये ५०० इतका दंड वसूल करून तो मुख्यमंत्री सहायता निधी यासाठी जमा करण्यात येईल, असेही आदेशात नमूद करण्यात आले आहे.