मराठवाड्यातील उपयुक्‍त पाणीसाठा ७१ टक्‍क्‍यांवर

औरंगाबाद  : संपूर्ण मराठवाड्यात ऑक्‍टोबर महिण्यात धुमाकूळ घालणाऱ्या पावसाने पाणीसाठ्यांची दशा बदलण्याचे काम केले आहे. आठही जिल्ह्यांतील ८७३ प्रकल्पांतील उपयुक्‍त पाणीसाठा नोव्हेंबरच्या पहिल्या आठवड्याअखेर  ७०.८४ टक्‍यांवर जाऊन पोचला आहे. दुसरीकडे या सर्व प्रकल्पांपैकी ६३ लघु-मध्यम प्रकल्पांना अजूनही पाण्याची प्रतीक्षा आहे. १५६ प्रकल्पातील पाणीसाठा अजूनही जोत्याखालीच असल्याची माहिती जलसंपदा विभागाच्या वतीने देण्यात आली. 

मराठवाड्यातील ११ मोठ्या प्रकल्पांमध्ये ८२.१७ टक्‍के उपयुक्‍त पाणी साठले आहे. जायकवाडी, निम्न मनार, विष्णुपुरी तुडुंब असून येलदरीत ९५ टक्‍के, माजलगावमध्ये ९१ टक्‍के उपयुक्‍त पाणीसाठा झाला आहे. सिद्धेश्‍वरमध्ये २३ टक्‍के, ऊर्ध्व पेनगंगा ७३ टक्‍के, निम्न तेरणा ३५ टक्‍के, तर निम्न दुधना प्रकल्पात अजूनही केवळ १२ टक्‍केच उपयुक्‍त पाणी आहे. सिनाकोळेगाव प्रकल्पातील उपयुक्‍त पाणीसाठा अजूनही शुन्यावरच आहे. ७५ मध्यम प्रकल्पांपैकी बीडमधील पाच व औरंगाबादमधील एक मिळून सहा प्रकल्प कोरडेठाक आहेत. १२ मध्यम प्रकल्पांतील पाणीसाठा जोत्याखालीच आहे.

लातुरमध्ये ३५ प्रकल्पातील पाणी जोत्याखाली

लातूर जिल्ह्यातील १३२ लघुप्रकल्पांमध्ये ५१ टक्‍के उपयुक्‍त पाणी आहे. १३२ प्रकल्पांपैकी ७ प्रकल्पांत पाण्याचा थेंब नसून ३५ प्रकल्पातील पाणीसाठा जोत्याखाली आहे. उस्मानाबाद जिल्ह्यातील २०५ लघुप्रकल्पांत ३४ टक्‍के पाणी आहे. २०५ प्रकल्पांपैकी ७ प्रकल्प कोरडे आहेत. ३९ प्रकल्पांतील पाणीसाठा जोत्याखाली आहे. नांदेड जिल्ह्यातील ८८ लघुप्रकल्पांत ८२ टक्‍के उपयुक्‍त पाणी आहे. ८८ प्रकल्पांपैकी ५ लघुप्रकल्पांतील पाणीसाठा जोत्याखाली आहे. परभणी जिल्ह्यातील २२ लघु प्रकल्पांत ५१ टक्‍के उपयुक्‍त पाणी आहे. एका प्रकल्पातील पाणीसाठा जोत्याखाली आहे. हिंगोली जिल्ह्यातील २६ लघु प्रकल्पांत ८९ टक्‍के उपयुक्‍त पाणी आहे.