थंडीत चढ-उतार

पुणे ः राज्यातील अनेक भागात थंडी किंचित कमी झाली आहे. कोकण, मध्य महाराष्ट्र, मराठवाडा व विदर्भात चढ-उतार असून विदर्भातील काही भागात थंडी आहे. अनेक भागात काही प्रमाणात थंडी गायब झाली आहे. आज (ता. १५) राज्यातील काही भागात थंडी कमी अधिक स्वरूपात राहणार आहे. मंगळवारी (ता. १४) सकाळी विदर्भातील येथील नागपूर येथे सर्वात कमी ९.४ अंश सेल्सिअसची सर्वात कमी किमान तापमानाची नोंद झाली असल्याचे हवामान विभागाच्या सूत्रांनी सांगितले.   उत्तरेकडून वाहत असलेल्या थंड वाऱ्यांचा प्रवाह कमी होऊ लागला आहे. यामुळे राज्यातील थंडी कमी होऊ लागली आहे. विदर्भात थंडी असली तरी कोकण, मध्य महाराष्ट्रातील काही भागात थंडी कमी झाली आहे. खान्देश, मध्य महाराष्ट्रातील काही भाग व मराठवाडा या भागात थंडीत चढउतार आहे. त्यामुळे काही भागात किमान तापमानाचा पारा सरासरीच्या तुलनेत पाच ते सहा अंश सेल्सिअसने वाढला आहे. विदर्भातील काही भागात किमान तापमान सरासरीच्या तुलनेत तीन ते चार अंश सेल्सिअसने कमी झाला आहे. त्यामुळे थंडी किंचित कमी झाल्याने किमान तापमान नऊ अंश सेल्सिअसपर्यंत होते. गेल्या चार ते पाच दिवसांपूर्वी हा किमान तापमान पाच अंश सेल्सिअसपर्यंत खाली आले होते. मात्र, पुन्हा किमान तापमान वाढू लागले आहे.   राजस्थानच्या परिसरात चक्राकार वाऱ्याची स्थिती तयार झाली आहे. त्याचा परिणाम राज्यातील थंडीवर झाला आहे. बहुतांशी भागात हवामान कोरडे असले तरी थंडी कमी झाली आहे. त्यामुळे किमान तापमानात वाढ झाली आहे. कोकणातील मुंबई, सांताक्रुझ अलिबाग, रत्नागिरी, डहाणू या भागातही थंडी कमी झाल्याने किमान तापमान १९ ते २१ अंश सेल्सिअसच्या दरम्यान होते. मध्य महाराष्ट्रातही थंडी कमी अधिक स्वरूपात आहे. त्यामुळे निफाड येथे १३.० अंश सेल्सिअस एवढे किमान तापमान होते. तर उर्वरित नाशिक, पुणे, मालेगाव, जळगाव, महाबळेश्वर, सातारा, सोलापूर, कोल्हापूर, सांगली या भागातही थंडी कमी झाली आहे.  मात्र, अधूनमधून या भागात हवामान ढगाळ, तर सकाळी धुके पडत आहे. मराठवाड्यात औरंगाबाद, परभणी, बीड, उस्मानाबाद, नांदेड या जिल्ह्याच्या बहुतांशी भागातही थंडी कमी झाली आहे.  उस्मानाबाद येथे सर्वात कमी ११.४ अंश सेल्सिअसचे सर्वात कमी किमान तापमान नोंदविले गेले. उर्वरित भागात किमान तापमानाचा पारा १३ ते १४ अंश सेल्सिअसच्या दरम्यान होता. विदर्भातही गोदिया, नागपूर, चंद्रपूर, वर्धा, अमरावती, अकोला या भागात कमीअधिक स्वरूपात थंडी होती. त्यामुळे किमान तापमान ९ ते १६ अंश सेल्सिअसच्या दरम्यान होते.   मंगळवारी (ता. १४) सकाळी आठ वाजेपर्यंतच्या चोवीस तासांतील विविध ठिकाणचे किमान तापमान, अंश सेल्सिअसमध्ये, कंसात वाढ, घट ः नगर १२.२, अकोला १३.६ (-१), अलिबाग २०.९ (३), अमरावती १३.० (-२), औरंगाबाद १४.६(२), बीड १६.० (२), बुलढाणा १६.६ (२), चंद्रपूर १२.२(-३), डहाणू १९.३ (२), गोंदिया १०.५ (-३), जळगाव १५.२ (३), कोल्हापूर १८.० (३), महाबळेश्वर १२.९ (-१), मालेगाव १७.२ (६), मुंबई २०.० (३), नागपूर ९.४ (-४), नांदेड १३.५, नाशिक १५.० (५), निफाड १३.०, उस्मानाबाद ११.४ (-३), परभणी १३.२ (-१), लोहगाव १५.८ (४), पाषाण १५.८ (४), पुणे १४.८ (४), रत्नागिरी २१.० (२), सांगली १७.४ (३), सातारा १४.७ (२), सोलापूर १६.६, ठाणे २०.०, वर्धा १२.१ (-१), यवतमाळ १५.०.