परभणीत पहिल्या दिवशी १७५ किलो भाजीपाल्याची विक्री; वर्णेश्वर ॲग्रो प्रोड्युर्स कंपनीचा पुढाकार

परभणी : कृषी विभागाच्या महाराष्ट्र स्पर्धाक्षम कृषी प्रकल्पांतर्गत स्थापन वर्णा (ता.जिंतूर) येथील वर्णेश्वर ॲग्रो प्रोड्युर्स कंपनी तर्फे सभासद शेतक-यांचा भाजीपाला विक्रीसाठी परभणी शहरातील विविध नागरी वस्त्यांमध्ये शेतकरी ते ग्राहक भाजीपाला विक्री हा उपक्रम सुरू करण्यात आला आहे.

शनिवारी(ता.४) शिवाजीनगर येथे या उपक्रमाचे उद्घाटन करण्यात आले. पहिल्या दिवशी ग्राहकांचा चांगला प्रतिसाद मिळाला असून १७५ किलो भाजीपाल्याची विक्री झाली, त्यातून तीन हजार ३०० रुपये मिळाले. उद्घाटनास जिल्हा उपनिबंधक (सहकारी संस्था) मंगेश सुरवसे, जिल्हा पणन व्यवस्थापक पंकज चाटे, शेतकरी उत्पादक कंपनीचे अध्यक्ष दिलीप अंभुरे, माणिक अंभुरे, कृषी अभियांत्रिकी महाविद्यालयातील डॅा.गोपाळ शिंदे, जिल्हा परिषद कर्मचारी पतसंस्थेचे अध्यक्ष गजानन लोंढे आदींसह ग्राहक उपस्थित होते.

संचारबंदी काळात शहरातील ग्राहकांना भाजीपाला उपलब्ध करून देण्यासाठी जिल्हा अधीक्षक कृषी अधिकारी संतोष आळसे, जिल्हा निबंधक (सहकारी संस्था) श्री. सुरवसे, आत्माचे उपसंचालक के.आर.सराफ यांच्या, पणन मंडळाचे जिल्हा व्यवस्थापक श्री. चाटे यांच्या संकल्पनेतून परभणी शहरातील विविध नागरी वसाहतीमध्ये शेतकरी ते ग्राहक भाजीपाला विक्री हा उपक्रम वर्णेश्वर ॲग्रो प्रोड्युर्स कंपनीच्या माध्यमातून राबविला जात आहे.

वर्णेश्वर शेतकरी उत्पादक कंपनी चे सभासद असलेल्या वर्णा, कडसावंगी, चांदज, बोरी, कौसडी, नागठाणा, गोंधळा आदी गावातील ५० भाजीपाला उत्पादक शेतक-यांच्या शेतातील भाजीपाला संकलित करून वाहनाव्दारे परभणी शहरात आणला जात आहे. दररोज सकाळी ७ ते ११ या वेळेत परभणी शहरातील एका नागरी वसाहतीमध्ये या भाजीपाल्याची विक्री केली जात आहे. तत्पूर्वी त्या-त्या वसाहतीमधील नागरिकांच्या व्हॅाट्सअप ग्रुपव्दारे भाजीपाला विक्रीसाठी आणत असल्याची सूचना दिली जात आहे.