नांदेड जिल्हा बँकेच्या अध्यक्षपदी वसंत चव्हाण 

नांदेड : नांदेड जिल्हा मध्यवर्ती सहकारी बँकेच्या अध्यक्ष व उपाध्यक्षपदासाठीची शुक्रवारी (ता. १६) निवड प्रक्रिया पार पडली. यामध्ये नायगावचे माजी आमदार वसंत चव्हाण यांची अध्यक्षपदासाठी, तर उपाध्यक्ष पदासाठी राष्ट्रवादी काँग्रेसचे जिल्हा अध्यक्ष हरिहर भोसीकर यांची निवड झाली. 

पालकमंत्री अशोक चव्हाण यांच्याकडून दोघांच्या नावावर शिक्कामोर्तब केल्याने उमेदवार अर्ज दाखल करण्यात आले होते. त्यांच्या विरोधात एकही अर्ज आला नसल्याने दोघांचीही निवड बिनविरोध करण्यात आली. राजकीय प्रवासात आमदार चव्हाण यांनी गावच्या सरपंच पदापासून जिल्हा परिषद सदस्य, विधान परिषद सदस्य, विधानसभा सदस्य, नायगाव मार्केट कमिटी अध्यक्ष आणि आता नांदेड जिल्हा बँकेचे अध्यक्ष अशी नामी पदे भूषवीत आपल्या राजकीय, सामाजिक व सहकार क्षेत्रातील विविध पदांचा कार्यभार सांभाळत सातत्यपूर्ण कार्याची चमक दाखवून दिली आहे. 

नांदेड जिल्हा मध्यवर्ती सहकारी बँकेच्या या निवडीमुळे माजी आमदार चव्हाण यांचे पूनर्वसन झाले. शिवाय राष्ट्रवादीचे ज्येष्ठ नेते हरीहर भोसीकर यांना देखील जिल्हा बँकेच्या रूपाने चांगले पद मिळाल्याने जिल्ह्यातील राष्ट्रवादीच्या गोटात आनंदाचे वातावरण दिसून येते. 

दुसरीकडे नायगावकर पुन्हा राजकीय क्षेत्रात जोमाने पुढे येतील याची देखील चर्चा राजकीय वर्तुळात आहे. दुसरीकडे जिल्हा बँकेच्या निवडणुकीत भाजपाचे चार विजयी उमेदवार अर्ज दाखल करण्यात कुठेही सक्रिय सहभाग दिसून आला नाही. दोन्ही विजयी उमेदवारांच्या या निवडीबद्दल सर्वत्र आनंदोत्सव साजरा केला जात आहे. सर्वच क्षेत्रांतून त्यांचे या निवडीबद्दल अभिनंदन ही करण्यात येत आहे.